大嶼山禁區咪亂入 小心墮入代辦禁區紙騙局

一直以來，南大嶼山都列為「封閉道路」，進入呢一區嘅汽車，需要向運輸署申請俗稱禁區紙嘅「大嶼山封閉道路通行許可證」。除咗當區居民可申請呢張禁區紙，2016年起當局推出「大嶼山自駕遊」計劃，每日批出25張即日來回嘅禁區紙，不過由於需求太多，使用率超過90%，禁區紙一紙難求。

疑似騙徒Facebook賣廣告

有不法之徒，就曾經利用市民想駕車去大嶼山嘅渴求，於社交媒體訛稱代辦大嶼山禁區紙，收取客人費用及個人資料，然後逃之夭夭。去年警方就搗破相關犯罪集團，拘捕兩名賊人，而最近 Facebook 又見類似廣告出現，雖未有證據顯示為騙局，但登記前懇請小心考慮。

至於硬闖行為，就更加要不得，2021年1月，警方已於東涌道禁區地帶打擊違例進入禁區行動，票控近百名駕駛者。

大嶼山路窄彎多

大嶼山南部道路受制於地理環境，道路情況同市區好唔同:

• 道路較市區狹窄 (如嶼南道)
• 急彎多 (如羌山道)
• 斜路堅係斜 (如東涌道、昂平道)
• 大嶼山多流浪牛及野生動物

汽車廢氣會破壞環境，污染空氣。既然去郊外都係想享受大自然，咁放棄自駕乘搭公共交通工具，都十分之應該。

資料: 東網、星島日報