屋企隻倉鼠咁可愛,點可以隨便遺棄?

政府發現倉鼠有疫症,下令將超過2000隻倉鼠及其他小動物「人道毁滅」。一道行政命令,終結2000條弱小生命,就算唔係特別關注動物權益嘅人,聽到都為之震驚。以下資訊綜合本地新聞報道,整理事件來龍去脈:

  1. 銅鑼灣一間寵物店,有員工確診 Delta 變種病毒後。其後再多一名女顧客確診,女顧客丈夫亦初步確診
  2. 政府驗出銅鑼灣寵物店有11隻倉鼠感染病毒,該店有兩批倉鼠分別於12月22日及1月7日,由荷蘭入口
  3. 政府宣告將店內及倉庫超過2000隻倉鼠及細小動物進行檢驗,檢驗後會將佢哋「人道毁滅」
  4. 政府呼籲於12月22日後購入倉鼠嘅市民,向政府申報,主人及其家人要去竹篙灣隔離,倉鼠要交送政府做化驗 (未知會唔會「人道毁滅」)

即係話,患上疫症嘅倉鼠,係上個月由荷蘭入口,如果你嘅倉鼠養咗超過三個禮拜,其實完全唔關事。

全民救鼠大行動

政府嘅行動,令好多人養倉鼠市民相當惶恐,有人擔心倉鼠成為播毒媒介。1月18日下午,有網民陸續喺街上發現被棄養嘅倉鼠:

事實上,棄養行為十分可惡。事關受感染倉鼠係由外地輸入,你屋企隻嘅倉鼠唔會無緣無故染疫。況且到而家為止,仍未有足夠證據證明病毒係由倉鼠跨物種傳染畀人類。佢都係家中一份子,無理由因為未肯定嘅講法而放棄佢。就算因為家人反對,逼不得已要放棄陪伴多時嘅小倉鼠, 其實亦可以聯絡相關團體接收。(相關團體見文末)

一般市民,如果喺街上見到棄養倉鼠,可以用以下方法拯救佢哋:

  1. 搵個膠箱或膠杯,將佢哋裝住 (紙箱佢哋會咬穿)
  2. 於容器入面放少少紙碎,放少少水,無倉鼠糧就放啲米、新鮮粟米粒、烚雞蛋蛋白等食物
  3. 聯絡接收團體
  4. 注意:
    • 倉鼠有互相攻擊習性,一個容器放一隻倉鼠就好
    • 倉鼠唔食得多汁多水嘅食物,乾糧已足夠,唔好畀新鮮生果同蔬菜
    • 倉鼠唔濕得水,千祈唔好同佢沖涼
    • 倉鼠好細膽,盡量唔好同佢有接觸,佢緊張嘅話會咬人
    • 注意個人及倉鼠衛生,接觸倉鼠前後要清潔雙手

拯救倉鼠團體

以幾個組織會提供接收、拯救倉鼠等服務,有需要可以搵佢哋幫手。如有其他團體拯救倉鼠,亦可以聯絡 Fitz: 電郵 [email protected])

掌心生命-香港倉鼠關注協會
救救倉鼠關注組
香港倉鼠交流團
哈姆一族
珍奶倉鼠幼稚園-暫託日記
RLove 小動物渡假村
香港倉鼠部落 Hamster Blog HK


文章為作者意見,不代表Fitz立場。
歡迎投稿: http://fitz.hk/contribute/

⮑ YAS BYKE 踩車保 保障全港所有單車可行走的公路,任何想踩車的地點都可受到保障,覆蓋更加全面! 作為 YAS 的合作夥伴,Fitz。 讀者可享有限時1次 BYKE Pro 完整體驗! 把握機會為自己加添一份更全面的保障! 了解更多 BYKE Pro 詳情,請瀏覽此
首頁 > 生活 Life > 保育 Conservation > 倉鼠染疫惹殺身禍,哈姆一族全城「救得一隻得一隻」