大家好,我係 Jason,係一個運動愛好者,同時係一個香港運動品牌創辦人。咁多年來,我見到香港消費者一向習慣買外來國際大品牌,對本土品牌就唔會花太多時間了解。

天生運動愛好者

我由13歲就分別去咗英國同美國求學。喺外國生活咗超過10年,期間嘗試過各種運動,例如足球、美式欖球、田徑、籃球,仲有數之不盡嘅運動。我更加發現,喺香港好難揾到高性能嘅運動服裝來配合我嘅運動訓練。

工作經驗塑造今天的我

記得我16至23歲期間,做過超過5間公司,累積一定經驗,而最近一份就係喺美國波士頓嘅 Reebok 返工。喺 Reebok 嘅經歷,啟發到我喺香港創立本土品牌,並唔係無可能。咁多年來,香港嘅運動領域都無乜大突破,我想改變呢種外界對香港嘅睇法,於是決心創建自己嘅運動服品牌,支持返我哋香港嘅運動員,因為我睇到,運動服裝喺推動運動員身心上嘅極限訓練,係有幾咁大嘅影響。而且同運動員交談嘅過程入面,我發現佢哋喺訓練時嘅狀態得到提升,係可以直接喺比賽時反映出來,呢個正正係我想為香港運動員做嘅事情。

一切源於夢想

創立 Zyphr 已經係三年幾前,我準備好將品牌提升到一個更高嘅水平。隨住科技發展,體育科學每年都呈指數式嘅增長,我哋每日都喺度研究運動員嘅訓練同表現,希望藉着 Zyphr 嘅服裝,畀公眾分享更多嘅運動資訊。

同好多人年輕人一樣,我嘅熱誠喺追尋實現自己嘅夢想。創立 Zyphr 呢三年間,我喺品牌建設、市場營銷、尋找贊助商同埋揾廠家一齊研發最新嘅物料同技術方面得到大大嘅進步。

從一開始,我就知道創立品牌嘅旅途一啲都唔簡單,係一場持久戰。而我嘅座右銘、同時係 Zyphr 嘅口號 —「Dream Fearlessly」,意思就係喺追尋夢想嘅期間,感受到害怕是正常不過,但係你要一直堅持向前去追尋你啲目標。而我嘅目標,就係向所有人展示,香港都可以喺運動服裝物料技術以及美學設計方面,同全球運動服裝品牌競爭。我哋不再需要因為質素參差而局限我們嘅選擇,而呢一切就從香港開始。

Project Z

處於疫症嘅一年,畀咗我好多時間來思考我哋需要做啲乜,先可以突破運動服裝嘅界限,令我哋可係業界領先。呢一年來,我們一直研發一個叫 Project Z 嘅項目。呢個係一個國際性嘅概念,可以畀到全世界嘅健身愛好者使用。呢個項目將會喺今個12月正式啟動。

究竟係啲乜,我下回再講,請大家拭目以待!


文章為作者意見,不代表Fitz立場。
歡迎投稿: http://fitz.hk/contribute/
首頁 > 生活 Life > Zyphr創辦人Jason: 我對體育的執著