政府推出「安心出行」應用程式，話市民透過掃瞄二維碼，就可以記錄行蹤，協助追踪病毒傳播。特首強調「用唔用、裝唔裝」呢個程式，完全係「市民自願」。不過另一方面，食衛局話因為疫情惡化，政府會依照法例，強制所有受疫情影響嘅處所安裝程式，以便市民使用。
運動設施不能倖免
依照政府講法，喺法例559F章下，所有開放營業之表列處所及餐飲處所，於12月3日前要申請「安心出行」場所二維碼，並張貼喺當眼處供市民使用。呢啲處所包括餐廳、戲院、健身室、美容院、溜冰場等地。
計劃預計有近12,000個公私營場所參與，當中約7,000個為公營場所，包括所有政府轄下運動場、體育館、游泳池、沙灘、球場等。而私人健身中心同會所，因為屬559F章之下處所，亦要有二維碼供市民掃描。
唔裝App係咪唔俾進入場地?
市民進入有「安心出行」二維碼的場所後，再用App掃描，程式就會自動記錄場所及到達時間，離開時按「離開」，就能儲存出行紀錄。
暫時政府仲未強制市民安裝程式，所以就算場所有二維碼，你唔掃佢，都可以出入自如。不過特首早前講過:「唔排除要求市民進入特定場所，需使用有關程式。」即係話，就算政府唔強制市民安裝，佢哋只要強制處所負責人，禁止未掃描程式者進入，市民亦無可奈何要跟從。唯一可以選擇嘅，就係唔好入嗰個地方。
私隱岌岌可危?
政府強調，程式所記錄資料只會儲存喺手機，用家無法自行查閱出行記錄，亦唔會透過網絡對外發送。不過，有人發現「安心出行」要求使用手機多個權限，包括取用相片及媒體、檔案、儲存空間，以及更改或刪除內容等，質疑程式權限過大。
至於政府就向市民派定心丸，話出行資料31日後將自動刪除，政府或其他系統不會備份。不過唔少市民仍然表示擔心，有人更話會轉用2G手機。
資料: 政府新聞公告
講求綠色、環保、天然的健康生活。推廣新一代健康生活文化。
