西環碼頭3月1日起嚴禁公眾進入 為防疫定市民行為過火?

被譽為「香港天空之鏡」，曾於2013年獲選「香港公共空間大獎 (由市民開創的空間) 」嘅西區公眾貨物裝卸區，於3月1日開始關閉，進入者須出示有效安全卡或工作證。不過，有區議員指這個安排沒有諮詢過區議會，指政府黑箱作業，扼殺市民公共空間。

中西區區議員葉錦龍，2月27日喺 Facebook 發帖公開消息，3月1日開始關閉西環碼頭，非工作人員不得進入。葉錦龍強調，海事處呢項安排只係知會過區議會，之前並無諮詢過區內人士。

網上流傳: 碼頭被人玩爛咗

期後，@princekenjiwong 於 Instagram 發帖及 Story，公開西環碼頭疑似關閘真相，獲得大量網民轉載。內容大致為「有人用暴力去傷害守護碼頭既狗，亦有人喺西環碼頭放火、野餐、爬貨櫃、踩單車，嚴重影響西環碼頭工作嘅人及整個西環碼頭一向安逸既生態」，甚至提到「點解有人會可以冷血到幫船主隻狗做絕育，幫佢剃毛、劏肚、切JJ，但係唔幫佢埋線，任由佢啲血一直留到成個地都係。點解可以有人冷血到用士巴拿打斷人哋隻狗對腳。 」

 

在 Instagram 查看這則貼文

 

Kenji Wong 王子健（@princekenjiwong）分享的貼文

貨物裝卸區變身公共空間

全港共有6個公眾貨物裝卸區，俱由海事處管理，處方以投標方式，批出供營運商進行船隻貨物經海岸轉運及裝卸作業，每年處理約550萬噸貨物。西區貨物裝卸區，因對正維港，係觀賞日落理想地方，加上以前附近並無大型康樂設施 (當時未有中山紀念公園)，1990年代開始成為西環居民休憩地點。後來，更成為唔少電視劇、電影拍攝場地，令其人氣更盛；社交媒體盛行下，亦得到「香港天空之鏡」及 Instagram Pier 嘅美譽。海事處於2014年在閘門外貼上通告，警告非在該處工作的人士離開及禁止進入裝卸區。

近年，西環碼頭成為香港市民捍衛公共空間嘅戰場。2017年《施政報告》，提出將海濱用地出租為社區園圃，引起中西區居民組織反對，認為政府剝削市民使用的公共空間。同年，政府將西環碼頭租借予香港道教聯合會，舉辦「羅天大醮2017」，有居民以沒有諮詢為理由，反對政府黑箱作業，並要求容許市民共同制訂借用碼頭準則。

不過，發展局強調西環碼頭並非公眾地方，市民係非法擅入政府用地。而呢次海事處利用疫情為理由，於碼頭拉閘，亦貫徹政府態度。

觀乎政府近年嘅施政態度，要重新開放西環碼頭予公眾，似乎係緣木求魚，機會渺茫。上面呢啲天空之鏡靚景，香港市民隨時只能透過相片先可以再睇到。

資料: 維基百科、立場新聞