上海一名大媽，喺「小紅書」上睇到浙江天目山介紹，被山上雪景深深吸引，決定喺除夕由上海包車，搵埋幾個朋友，齊齊衝上去睇雪。
點知大媽上到龍王山頂 (海拔1,587米)，就同幾個朋友失散咗。大媽帶住佢兩歲嘅囝囝，慌不擇路亂咁行，行到天黑，大約六點鐘打電話報警，喊住同警察講:「我兒子不行了!」警方收到電話後大為緊張，先後派出近百名救援人員上山，喺攝氏零下10度之下搜救，3個半鐘頭之後，大約晚上9點半，成功搵到呢對母子。
救援人員向記者表示，佢兩母子當時情況相當危急，特別係兩歲嘅小朋友，已發現有失溫現象，意識模糊。好彩急救後情況好轉，可以被救援人員抱落山。
警方提醒市民，低溫環境以及高海拔地區，絕對唔適合小朋友逗留，並話呢次無搞出人命絕對好彩。而大媽亦被網民鬧爆，紅遍網絡。
----- 廣告 Ad -----
資料: 浙江在線
