----- 廣告 Ad -----
來自美國密芝根州嘅 Nante Niemi 今年8歲，早排跟住家人去到 Porcupine Mountains 州立公園露營。呢次係 Nante 第一次野外露宿，所以相當興奮，一去到營地就幫手執柴，點知期間越行越遠，唔識得返去營地。家人發現唔見咗 Nante，即時報警。
警方接報後大為緊張，先後動員約150名消防、警員以及義務人員搜救。兩日之後，其中一名義工喺距離營地3.2公里外地方，發現 Nante 匿咗喺大樹之下。Nante 雖然兩日無食物、無帳幕，不過精神唔錯，身體亦無乜損傷，安全無恙。
Porcupine Mountains 州立公園
原來 Nante 雖然係第一次露營，不過學校同家人教過佢野外求生技能，例如佢知道可以吐嚼積雪解渴，利用枯葉做成被鋪保暖。最重要就係，Nante 知道喺野生等待救援時，千祈唔四圍走，要喺原地守候，消防員亦讚賞 Nante 嘅求生方式，話比好多大人更為出色。
----- 廣告 Ad -----
Nante 經歷兩日野生solo之後，話唔會畀呢啲意外嚇怕，仲話好期待下次同家人再去露營。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。