Fitz > 新聞 News > 湖南女子長沙郊外露營,村民24小時內索款4次: 非私人地有如土匪

漁護署早前試行實名預約營地,市民可透過網上系統預訂「荃錦營地」營位,反應非常熱烈。對於實名預約制度,市民各有睇法,有的認為設計不錯,有的就寧願去其他營地繼續霸位,當然還有不少朋友選擇去私人場地。正所謂「咸魚青菜,各有所愛」,最緊要都係有套制度去跟,否則好似湖北呢位女子咁,露個營都要不停被村民騷擾,就真係非常麻煩。

傳媒報道,中國湖南有袁姓女子網上發文,指早前去到長沙露營熱點興馬洲露營,因為人太多就喺較邊緣地方落腳,點知一攞裝備出嚟,就有村民趕到收取「過夜費」,每人20元人民幣。當時女子未搞清楚情況,決定就俾錢了事,點知去到夜晚,又有村民過嚟收取「帳篷費」,攞個爐出嚟煮食,又要收取「煮食費」,統統都被女子拒絕。

到隔日早上,同一名村民又嚟到,話見到搭咗天幕,要收「天幕佔地費」,女子忍無可忍同村民爭論,最終村民敗走,去到下晝村民仲帶埋老婆嚟「發爛渣」,話「今次就算了,不收你天幕費用,平時都要收點費用的」。

去露營就係想靜下休息下,俾呢班村民搞真係咩心情都無晒,最諷刺嘅係,女子發現原來該處唔係私人土地,當地村委會負責人亦公開澄清:「村民自發收費沒有任何依據,如有旅客遇到類似情況,可保留證據向村委會進行投訴」。咁即係同搶有咩分別?


文章為作者意見,不代表Fitz立場。
歡迎投稿: http://fitz.hk/contribute/