東京時間6月7日早上9時半,東京品川區都營地下鐵淺草線中延站,一名年約50歲男子跳入電車軌道受傷送院,經搶救後宣告不治。同日下午2時,警方證實死者為日本奧運委員會 (JOC) 會計部長、現年52歲的森谷靖。警方將案件為自殺案,現正進行調查。

壓力太大吃不消?

森谷靖嘅自殺新聞,震驚日本國內社會各界,於 Twitter 成為最熱門話題。唔少人覺得 JOC 高層自殺,與7月23日東京奧運有莫大關係,因為呢大半年來負面消息不斷:

  1. 日本疫情居高不下,多個地區被逼實施多次「緊急法令」,包括限聚令、居家令等。疫情下要舉辧一場熱鬧嘅奧運會,似乎並不可能;
  2. 奧運聖火傳遞因疫情要閉門舉行;
  3. 截至本年6月,80,000名奧運義工當中,有10,000人已退出;
  4. 多份報章過去幾個月都進行過民意調查,超過一半被訪者反對7月舉行奧運;
  5. 疫情令海外旅客不能入境,亦令奧運失去由海外到訪嘅現場觀眾;
  6. 奧委會正考慮拒絕國內現場觀眾入場,假如落實,所有項目均閉門作賽;
  7. 大多數海外隊伍都取消去日本習訓安排
  8. 多間贊助奧運會嘅日本品牌,公開表示奧運會要延期或取消
早前日本有民眾示威反對奧運

奧運可唔可以如期舉行,仍係未知之數,於是有人相信森谷靖自殺,係因為不敵工作壓力而了斷生命。

賄賂醜聞消到埋身?

森谷靖自殺事件曝光後,日本各界議論紛紛,鍾意玩推理嘅日本人,就追查森谷靖嘅歷史,發現一單2019年嘅新聞可能有關。

2019年1月,傳媒爆出法國檢控當局,正追查前日本奧委會主席竹田恆和,指竹田於2013年申辦奧運時,賄賂國際田聯及國際奧委會多名官員及其家人,涉及金額為2.3億日本 (約港幣1600萬)。

雖然法國當局最後未有提出正式起訴,不過竹田恆和於2019年3月辭去奧委會主席。

日本博客表示,事件雖然於兩年前已告一段落,但森谷靖係日本奧委會會計部長,始終難以洗脫嫌疑。佢嘅自殺,亦令呢宗賄賂案件更加懸疑。

民眾反彈支持奧運?

早前多間傳媒機構嘅民意調查,都指超過50%被訪者反對如期舉行奧運。不過,喺森谷靖自殺當日,民情似乎逆轉。

《讀賣新聞》於6月7日早上 (森谷靖自殺消息公佈前) 發表最新民調,有48%被訪者希望奧運會延期或取消,呢次係自民調開始以來,反對比率首次跌破50%。亦即係話,距離舉行奧運日子越近,民眾似乎越來越接受奧運會呢個現實。

有人認為,森谷靖自殺,可能會激發國民支持如期舉行呢項盛事。

資料: Nikkei AsiaReutersYahoo! JapanNew24.jp


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 日本奧委會部長自殺身亡舉國震驚,疑與賄賂醜聞有關