一提到 Parkour,好多人都不禁諗起跳樓、玩命、街童、於是就將 parkour 標籤為高危運動。都明既,無啦啦係街度見到人跳黎跳去,以為係度搞事發神經,仲要企到鬼咁高,扮曬型搶 fol,印象係唔太好。

不過其實 Parkour 係一種好貼地嘅運動,唔係下下都上天台咁離地。Parkour 可以鍛練身體之餘,仲訓練埋觀察力、判斷力、思考能力同創意。

咩係 Parkour?

‘Parkour’一字解’道路’ (the path),係源自法國既運動,於90年代尾開始盛行。訓練 Parkour 既人叫 ‘Traceur’,會以最快方法、速度,由A點去B點。

“咁搭地鐵咪 Parkour 囉!”

咁又唔得! 條件係利用身體越過周邊環境既障礙物,可以包括欄杆、枱凳、水管、建築物……總之所有諗得出既障礙物都可以進行 Parkour。所以簡單黎講,Parkour 係種障礙物訓練,並「赤裸裸」咁唔用仼何輔助工具越過障礙物。

係呀冇錯,係一種訓練 ,啲動作唔係求其試下就做到,同其他運動一樣,要不斷練習,由淺入深。

同一般運動既不同之處就係,可以喺唔同既環境、地方進行; 有時啲人問我: 係邊度可以做 Parkour? 我會話: Arrr……冇特定場地架bo~; 更有趣既係,每個地方既障礙物種類、數目、佈局、距離都唔同,所以動作都會因應環境而改變,產生唔同變化。即使同一個地方,利用平平無奇既障礙物,都可以做出好多唔同既動作路線 (line/flow),就係睇你肯唔肯動腦筋,諗唔同既路線。諗到點做之餘,仲判斷自己有冇能力做到。假若失手,都要知道點樣係短時間內補救,將危險減到最低。所以 Parkour 好考觀察力、判斷力、思考能力同創意架。

咩係Freerunning?

但係就咁過障礙物又好似悶得制喎,所以 Parkour 再加上花式動作來點綴,就演變成 Freerunning 啦!

訓練 Freerunning 嘅人叫 “Freerunner”,Freerunning 同樣利用周邊環境既障礙物做出動作,動作可以係空翻 (flips)、轉體 (twists)、旋轉 (spins) 等。呢啲動作有啲來自體操、極限武術 (Tricking),甚至 Breakdancing。未完架,有時仲會自己鑽研,自創動作。

即使係好容易既動作,都可以係 Freerunning,因為 Freerunning 真係好 Free,無界限。而 Parkour 同 Freerunning 已經差唔多係不可分離,通常做 Parkour 都會做 Freerunning,所以會叫 Parkour & Freerunning,但懶啲就咁叫 Parkour 都ok。

其實 Parkour 幾適合香港人。香港人急速既生活節奏,講求快捷、效率,學 Parkour 就岩晒。成日遲到? 下次試下用 Parkour 追返啲時間啦,幾實用呀。同埋又可以隨時隨地揾個地方練習,唔洗嘥時間特登走去健身房啦。最重要係咩呀? 最重要係唔洗錢呀嘛! 何不踏出自己既 Comfort zone,挑戰下,嘗試下?

NC Channel HK Youtube Channel
Instagram: @ncchannelhk

Fitz連結: https://fitz.hk/?p=104613

更多:
Fitz Facebook 專頁


文章為作者意見,不代表Fitz立場。

歡迎投稿: https://fitz.hk/contribute/

廣告
NC.Leon
熱愛運動,唔做運動會死,亦都鐘意嘗試新事物,所以試過好多唔同嘅運動,例如體操、跆拳道、跳舞、行山、田徑、閃避球、足球、健球等,不過令我最享受,最沉醉嘅係Parkour。透過parkour,我學識超越自己,克服恐懼。 希望可以有更多人認識呢樣運動,感受到當中嘅樂趣。