台灣出生嘅林書豪，去年輾轉返到大陸打CBA，加盟北京首鋼，不過今季表現強差人意。最近一場賽事，林書豪出場5分鐘，0得分0貢獻，被教練換走。呢次林書豪嘅表現激嬲一班大陸籃球迷，《搜狐》更以「32分28分24分! 林書豪睜大眼睛看看吧 這才是CBA外援!」話與林書豪同場嘅三名外援，個個拎到廿幾三十分，林書豪呢啲0分球員，並不具備外援水準。有媒體甚至叫林書豪做「0來瘋」(佢有個綽號係「林來瘋」)，相當刻薄。
大陸球迷咁激動，相信好大程度因為林書豪係名氣甚大嘅前NBA球員。佢曾於2010年代喺NBA大放異彩，24歲時效力紐約人進入季後賽。後來因傷患纏身，狀態下滑，2019年於多倫多 Raptors 擔任大後備，但反而贏得總冠軍，成為第一位美籍亞裔球員取得冠軍指環。
奪得殊榮後，林書豪去咗大陸打CBA，加盟北京首鋼，年薪300萬美元。佢第一次季亮相 CBA 取得好成績，於 CBA 全明星賽取得41分，季後更當選做 CBA 最佳外援球員。不過2020年因為大陸爆發疫情，CBA 停辦接近半年，林書豪亦返美國等待加盟NBA。
喺美國坐咗差唔多一年，林書豪未有班落，2021年重返 CBA，以年薪200萬美金再簽約北京首鋼。不過，林書豪本季 CBA 不似預期，平均只有12.9分、3.4籃板、4.9助攻，仲差過隊中大部份正選本土球員。而3月1日 CBA 第3階段開始後，林書豪4場比賽平均得分更低，只有7.5分、2.7助攻、3.3籃板。
按照CBA規例，每場比賽可以註冊三名外援球員，每節只能用一人，所以表現低沉嘅林書豪，就被球迷覺得「阻住地球轉」。而林書豪已年屆33歲，唔少人都覺得佢職業生涯已到盡頭。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。