去年英國政府全國撥款20億英鎊 (約320億港元)，鼓勵國民以單車代步及多做運動鍛鍊身體。不過，政策推行半年卻處處碰壁，遭受唔少駕車人士反對。
本月初，倫敦 Kensington 同 Chelsea 兩個地區議會，話自從路面開放單車徑後，幾個星期內共收到居民322宗投訴，指摘單車徑令交通擠塞。議會表示同意居民睇法，因為單車徑佔用社區路面約0.2%，將一條行車線劃成單車徑，令汽車流量大減。議會決定將呢條只係用咗7個星期嘅單車徑還原，浪費接近32萬鎊 (約320港幣) 公帑。
紅色方格係違泊車輛
不過，唔少單車團體反對議會呢項決定，佢哋話造成交通擠塞嘅原因，唔係單車亦唔係單車徑，而係該區嘅違泊車輛。有團體引用 CCTV 影片，發現有車輛泊喺單車徑上，單車使用者經過時唯有踩出馬路，造成擠塞。根據團體統計，有80%時間單車徑都有違泊車輛，話政府打擊違泊不力，令塞車問題嚴重。
議會話會繼續了解兩方睇法，再重新考慮單車徑開放問題。
資料: Cycling Weekly、The Guardian
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。