[新界單車徑網絡] 單車屯馬線60公里 踩後分享報告

我得個多月車齡，去過嘅地方唔多，呢次我分享下踩屯馬線 (60公里) 嘅經驗比大家參考下。

第一段: 屯門至元朗

屯門西鐵站出發，大部分路段沿住輕鐵路軌，後半段較多廢車場，村囗嘅位置。小心!

第二段: 元朗至上水

景點較多嘅一段，馳名 (?🤣) 綠色隧道雖然唔喺主幹線，但都唔算太遠，另外過咗博愛醫院差唔多到南生圍入口，踩馬路大概30分鐘到盡頭就係，之後可到新田購物城打卡，大水管，雙魚河就差唔多到上水市中心。

第三段: 上水至大埔

單車徑連接位可能要揾揾，尤其入隧道後係邊個出囗，之後要過兩次橋，可選搭電梯或斜路。景點唔太多，純粹踩車。

第四段: 大埔至馬鞍山

有力先入大美督😄，再踩經典賽道望下吐露港，到孖橋 (即濾水廠) 直去左轉就係海濱長廊，終點係馬鞍山公園。

沿途補給站，洗手間都算多，午飯建議喺上水或大埔，因較順路同較近單車徑唔駛周圍揾。

文章及圖片由網友 Dick Cheung 提供，鳴謝授權轉載。