佛羅里達州一間單車舖,未開門已有顧客排隊等買嘢

美國市場分析機構 NPD Group,最近統計全國單車銷售量,發現今年3月單車銷量,比去年同期增長達39%,此外有83%單車舖更有缺貨壓力,美國單車市場一下子熾熱起來!

單車舖要加薪留員工

德州侯斯頓一間車單舖東主 Eric Attayi,話生意多到連自己都唔信。Eric 話佢今年2月開始無放過一日假,每日舖頭電話響個不停,為咗安撫做到無時停嘅員工,公司大幅加薪。Eric 仲話,單係5月嘅生意額,已等於舊年全年總和!

問到消費者而家鍾意咩車款,Eric 話佢哋見兩個碌就買,總之單車就好似廁紙一樣,大家見有貨就搶

加州 Westminster 一間單車舖老闆,話因為顧客太多,幾個月都唔敢放一日假

喺洛杉磯開設三鐵專賣店嘅 Robert Keating,話佢開業37年都未見過咁誇張情況。佢哋原本只賣高階三鐵單車,為咗滿足顧客需要,都要賣埋平價休閒車。

Robert 話除咗多咗生意,亦唔少人踩上單車後,發現體力大不如前,於是順道搵佢哋訓練體能,令生意更興旺。

Robert 以及其他業內人士相信,因為疫情令大家更注意健康生活,亦因為健身室、泳池等運動設施封閉,令唔少人轉行踩單車。此外有好多人為咗避開乘搭公共車輛,亦轉以單車代步。

唔少人除咗買新車,亦會將舊車修理

唔少支持單車普及嘅團體,都希望趁機會向政府游說,增加城市內單車設施,令單車運動更普及得以長久發展。

資料: CNN

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。