Twitter 最近流傳一條短片,一班單友喺馬路邊練車,突然發生意外:

事件發生喺澳洲城市紐卡斯爾 (Newcastle),當時車友一行十幾人,沿住馬路邊嘅開放單車徑訓練,突然間有私家車貼近,並掃低兩名車手,一人輕微擦傷。另一人被汽車倒後鏡拖行一段路,弄至骨折。

涉事私家車司機其後主動停車報警,並接受警方盤問。而拍攝片段嘅車友向記者表示,公開短片係希望無論汽車司機或單車車手,都要注意安全。

香港嘅馬路好危險

香港無呢款「開放式單車徑」,不過容許單車喺於馬路上行駛 (除非附近有單車徑)。另一方面,香港人普遍視單車為休閒活動,只適合喺單車徑、單車公園慢慢踩下,所以單車友常被貶稱為「路權人士」,喺馬路上往往備受敵視。

澳洲最近有人研究單車同汽車爭路問題,昆士蘭省布里斯班 (Brisbane) 因為汽車及單車數字大幅上升,道路不足,有專家提出解決方法並非起路起橋,而係重新審視有關法例: 例如設立單車登記制度,控制單車數量、培訓騎乘者,及要求單車車主購買第三者保險。

呢個方向喺香港係咪可行? 汽車同單車幾時先可以和平共存? 要睇下政府有無新板斧。

資料: Cycling WeeklyNew.com.au

首頁 > 運動 Sports > 單車 Cycling > 澳洲單車徑被指設計不善 汽車掃低單車群多人受傷