馬來西亞10歲男童陳政滔，上周五 (18日) 於屋企門外踩單車跌倒，單車手柄擊中腹部，身體有輕微擦傷，不過當晚只有輕量作嘔，未有不良狀況。
星期六 (19日) 男童發燒，不過診所無開門，爸爸只有去藥房買退燒藥畀囝囝食住先。
星期日 (20日) 男童發燒未退，送到診所求診，醫生話跌傷唔會發燒，仲話有可能係感染肺炎病毒，要男童進行病毒測試。
同日傍晚，男童嘔吐大作，精神變差，被送至醫院進行X光等檢查。高燒仍未退，更出現癲癎。凌晨時份，突然心跳停止，宣告死亡。
醫護先入為主以為係疫症
爸爸覺得囝囝死因，同多名醫護診症態度有關。佢話由診所、藥房，以至醫院嘅醫生、護士，一聽到病人發燒，就先入為主覺得係病毒感染，只係強逼病人去進行病毒測試，無考慮過係其他問題。有醫生更加話跌傷係唔會發燒，令佢感到莫名其妙。
不過，根據醫院解釋，佢哋有為死亡男童進行過身體檢查，睇唔到有內臟受損。而病毒測試嘅結果係陰性，顯示男童並無確診。
至於真正死因，要經解剖後先知，結果會於一個月內公佈。
資料: 光明日報
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。