單車節中伏啱啱嘅星期二(7月22日)fitz.hk嘅facebook專頁發帖,話「香港單車節」嘅大會網站正式開通。我哋滿以為大家會熱切等待佢報名嘅一刻,齊齊衝入報名。但有心水清嘅網友,一嘢就發覺呢個活動伏兵重重。

網友Sajmay Lau睇過佢嘅活動詳情,發覺呢個活動有好多問題。

單車節嘅官方圖片
單車節嘅官方圖片

其中一項,係報名參加35公里挑戰組(個人及隊際),或者10公里悠遊組,都要進行賽前嘅「技術評核」。評核呢件事對好多車友而言都嚇一跳,而佢哋嘅安排亦有好多問題:

單車節中伏001
(按圖放大)
  1. 報名時要揀定三個時段去評核。但真係幾時評核呢?佢哋會三日前通知你。三日!係三日!你有心約朋友食飯都唔會三日前通知啩。做打工仔女,三日前先向老闆請假,佢唔黑你面就奇。
  2. 評核時嘅單車係由大會提供。哼,你叫關公唔好騎佢隻赤兔馬打仗,你話佢肯唔肯過你?
  3. 評核內容要20分鐘完成10公里(35公里組),或10分鐘完成3公里(10公里組),呢方面大家無乜異議。但之後一項就令人抓爆頭:16秒要完成60米窄路掉頭。明明係要踩公路,做乜要人窄路掉頭呢?仲話任何一隻腳都唔可以落地,嘩,使唔使花式表演?

有車友話,踩單車唔同渡海泳,踩單車嚟講,識踩就識踩,唔識踩好自然會PK,根本唔使評核。

而最有趣嘅係,呢個活動並唔係比賽,連排名都無,要考大家技術做乜?


除此之外,睇清楚佢活動嘅細則,就發現呢個活動好多規範,比如話好嚴格咁限制參加者幾時要過checkpoint,過時會被接走;青馬大橋又唔畀人超車……

或者呢個係第一次咁大型嘅鬧市單車活動,大會先咁緊張啦,不過,睇怕佢哋咁搞一搞,大家都唔會有咩心情參加囉。

P.S. 有關當局仲同東亞銀行搞咗個「優先報名」,網友話而家睇演唱會咩!? 老老竇竇,會唔會參加資格都好似啲演唱會飛咁俾人內部認購晒?單車節中伏002更多:
[香港單車節] 鬧市踩車 機會難得
[擁抱路權] 單車絕對不讓私家車的原因!
[側邊係單車徑] 三鐵賽無得踩單車
Fitz Cycling 單車

其他文章:

廣告