台灣一名30歲男子好鐘意踩單車,每個禮拜都操番幾十至100公里。不過,佢最近發現由屁股到大腿內側,經常都有麻木感覺,仲話自己「性功能完全不行」,真係聞者傷心,聽者流淚。

呢單case喺台灣一個電視節目討論,節目上醫生解釋,生殖器嘅血管同神經,都係從骨盆底向內側繞過去,所以踩單車如果坐墊唔合適,就會壓住血管同神經,踩得越耐傷害越大。

性無能並不常見

雖然上面單case咁得人驚,不過各位男仕都唔使太緊張。2014年英國一項調查,訪問咗5,282名男性單車愛好者,當中無人出現性功能問題,顯示踩單車影響性能力嘅情況並不常見。

不過,踩車時覺得唔舒服,就一定要正視。前美國單車隊隊醫 Andy Pruitt 話:

「你踩踩下單車 feel 到有啲麻痺感,以為忍一忍就無事。不過,其實任何時間都唔可以容忍麻木,因為呢個意味住神經受到壓迫,停止運動之後或者會回復正常,不過如果長時間忽略呢種麻痺感,就可能造成長期損害。」

其實無論男女,長時間踩單車都可能會引發皮膚或神經問題,所以必要留意 seat 位情況:

  1. 揀選一個舒適而合身嘅坐墊
  2. 踩車前調較好seat位高度及位置
  3. 若發現seat位有損壞,必需盡快更換

資料: 東森新聞Bicycling

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。