瘟疫症全球蔓延，令單車需求大幅飊升。一方面唔少人希望強身健體，選擇單車運動，另一方面公共交通工具成為播毒途徑，單車代步成為較為安全嘅出行方式。
不過，因為現今單車零件嚟自不同國家，全球疫情反覆令單車生產量不穩，出現供不應求。美國芝加哥一間單車店東主表示，佢哋疫情以來希望購入100部單車，但至今只係得十幾部可以推出市場。老闆話甚至話，佢哋有錢都搵唔到單車賣俾客人。
當單車奇貨可居之際，不法之徒就鋌而走險，偷竊二手單車再出售圖利。美國警方稱，單車失竊係呢段期間上升最快嘅罪案。芝加哥嘅單車失竊案件，由去年每月195宗，上升至今年每月208宗。而民間組織「失竊單車登記處」(Chicago Stolen Bike Registry) 今年10月收到嘅報告比去年同期增加48%。
成部單車偷唔到，零件都唔放過。
----- 廣告 Ad -----
有芝加哥車友 Jack 話，單車被偷根本係避無可避，除非將單車鎖入屋，否則單車泊喺街已經預咗被人偷，而佢本人部單車，竟然係喺屋企後門被偷，非常無奈。
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。