[自由潛水] 發揮人類潛能

自由潛水英文叫 freediving (喺泰國開學校嘅教練朋友話好多人以為係「免費潛水」)，簡單咁講即係閉氣潛水。好多人以為人類一定要用氣樽先潛到水，但其實我地與生俱來就有閉氣潛水嘅能力，只係需要一啲練習同適應去將呢個潛能發揮出黎。

點解玩自由潛水?

第一，佢比水肺潛水更有挑戰性，更令人融入海洋；第二，要嘅器材少好多，簡單至一個 mask 一枝  snorkel 一件泳衣/一條泳褲就可以落水，冇潛水儀器阻住身體活動，真正嘅自由自在。

自由潛水潛到落幾深?

世界紀錄係過百米，一般人上完三日課程之後都會潛到去十幾米，其實同學水肺潛水差唔多。

邊度有得學?

老實講，香港嘅環境唔太適合自由潛水，夏天水暖但能見度低 (有時唔夠一米!)，冬天水清但凍，而且唔夠深度；如果金錢同時間負擔到的話去東南亞 (例如泰國，峇里，菲律賓) 或者台灣學會有一個更好嘅體驗。

埃及自由潛水

今年由六月開始，我同另一位教練 Leo 就嚟咗埃及一個叫 Dahab 嘅小鎮訓練。埃及唔係香港人嘅熱門旅遊地點，更何況喺度住幾個月。點解揀呢度? 其中一個好現實嘅原因係「平」(每個月租屋同生活費一共四千蚊左右)，同埋呢度有適合自由潛水嘅環境：岸邊游出去已經有四、五十米 (香港得十米八米)；能見度長期有二十米以上 (香港夏天通常得兩至三米)，同埋有一個近岸藍洞，九十幾米深，比出面「風平浪靜」；最最最重要—樣野係，Dahab 呢個地方人稱「自由潛水聖地」，好多世界級自由潛水運動員都會黎呢度訓練同比賽，我哋喺度識到好多朋友閒閒地都潛到落七、八十米，同佢地交流學到好多野。

自由潛水比賽

參加自由潛水比賽，係我地今次嚟埃及其中一個目的，比賽喺藍洞舉行。我地喺八月頭舉行嘅比賽入面一共破咗三項香港紀錄 (主要係因為自由潛水喺香港係新興運動，未有太多人玩，但我地都好希望可以有多啲人接觸呢項運動)；黎緊 Leo 喺九月中會去泰國繼續教水肺同自由潛水；我就會繼續喺 Dahab 訓練，希望可以參加十月尾嘅另一個比賽。

(編按：作者 Eva 是自由潛水教練，由六月開始到埃及練習。亦因為此運動在香港不太普及，所以希望透過分享文章，將這項運動推廣開去。)

Holos Freediving Facebook專頁

更多：
Fitz Facebook專頁
[攀石女學潛水] 進階開放水域潛水員證書 (第一天)
[山女行] 潛入藍碧海峽 印尼 Lembeh Strait
Fitz Diving 潛水