上海爆發疫情要封區封城，好多上海人生活突然停頓，不過被困上海嘅台灣歌手劉畊宏竟然借勢彈起，佢推廣嘅「毽子操」成為熱門健身運動。
10日粉絲增3000萬
台灣歌手劉畊宏，一直都同大陸太太 Vivi 喺抖音搞直播，內容都係講下生活，同粉絲吹下水，最初追踪人數亦唔算多只有600萬左右。直到今年4月初，佢一次直播被官方指「衣著不良」而中斷。鄭畊宏一怒之下，第二日著住羽絨大褸做直播，竟然上咗熱門。十幾日之間，頻道多咗3000萬粉絲。
與此同時，本身係健身教練嘅劉畊宏，亦有搞健身操直播。呢段時間，撞啱上海等城市有隔離措施，好多人被逼留喺屋企，於是又多咗批人跟住劉畊宏做運動。4月24日，劉畊宏直播「燃脂毽子操」，吸引6420多萬人上網同時觀看，累積人次超過1億。
「毽子操」成網上現象
呢次直播令「毽子操」成為網上現象，情況類似當年韓國鄭多燕嘅減肥操。呢套健身操模仿踢毽動作，聲稱有效鍛鍊腿部、臀部、腹部等肌肉，仲可以鍛鍊心胸。而且佢標榜唔使器械，隨時隨地可以做，所以吸引大批民眾爭相學習。
不過有健身教練話，劉畊宏呢套「毽子操」只係集中腿部嘅擺動，好多時更要單腳站立，對於平時少運動、欠缺平衡力嘅人士，好容易會發生意外。而事實上，網上已經有唔少同「毽子操」相關嘅意外報道。
此外，台灣《聯合報》亦引述專家指，幾千萬粉絲只係數字，要將支持者轉為實際收益，仲有一大段路。
以下「毽子操」短片，大家會唔會跟住操?
資料: 聯合報
