周日 (8月7日) 舉行嘅廣東省運動會U15男足決賽，廣州隊對清遠隊，雙方踢成5:3，廣州奪得冠軍。不過球迷直指比賽過程充滿虛假成份，有打假波之嫌。
唔少波迷話，原本以3:1領先嘅清遠隊，下半場換人後十幾分鐘內被連入四球。畫面可見，清遠嘅後防球員連番失誤，呆若木雞，加上守門員門前直接將球踢給對方前鋒，令廣州輕鬆入球，最後贏出賽事。
賽後，不少網民於網上發帖質疑比賽公正性，甚至「廣東省運會U15男足決賽假球」成微博熱搜榜熱議，並認為15歲就踢假波，行為相當不可取。
網上有人爆料指，呢場比賽嘅勝負，關係球員補貼、學籍、公司，以至各地足協等問題，矛頭直指廣州市足協。由於事件被鬧至全國媒體，終於驚動中國足協，宣佈調查事件。
