Fitz > 運動 Sports > 足球 Football > 華拉度列升班西甲,班主朗拿度找數踏上500公里朝聖之路

巴西球王朗拿度,近年定居西班牙,仲入主西班牙乙組球會華拉度列 (Real Valladolid)。今屆賽事,華拉度列雖然僅以得失球差失落西乙冠軍,但仍足以獲得升班資格重上西甲。班主朗拿度話,每位球員可獲15萬歐元獎金 (約港幣126萬),仲話會找數完成500公里「朝聖之路」(Camino de Santiago, 英文 稱為 Way of St James)。

話說,朗拿度2018年入股華拉度列 (現佔82%股權),當時已許下承諾,假如球會升班就會踏上「朝聖之路」。如今夢想成真,朗拿度亦會喺6月5日展開佢嘅旅程。

朝聖之路 Camino de Santiago

歐洲各地到達西班牙 Santiago de Compostela 嘅朝聖之路

西班牙西北部城市 Santiago de Compostela 為宗教聖地,據講呢度發現聖雅各嘅遺骸。呢條「朝聖之路」路線眾多,都以聖地為最終目的地,而天主教信徒會由西班牙各地,以至法國、德國、意大利、波蘭等國,徒步到達 Santiago de Compostela。而朗拿度同太太走嘅路線,會由中部城市華拉度列出發,全程大概500公里。朗拿度亦坦言自己已經跑唔郁,所以會以踩單車方式,分五個階段完成。

朝聖之路標記

2002年世界杯決賽周,朗拿度以8個入球奪得金靴獎。20年之後,45歲嘅朗拿度變咗做大肥佬,希望佢平安完成啦。

資料: ESPN


⮑ YAS HYKE 行山保 保障範圍涵蓋全港所有山野及行山徑,5程僅需$75 (Fitz 讀者優惠$50/5程),便享有意外醫療、財物以及身故賠償等保障,合共保額超過HK$300,000。