世界盃擬改兩年一屆，若成事FIFA向成員各派1900萬美元

國際足協 (FIFA) 最近再次提出，將世界盃改為兩年一屆，並話希望於2026年實現。呢次佢哋打正旗號打「金錢牌」，用錢去爭取成員嘅支持。

FIFA 於12月20日大會上，披露一份獨立報告，指如果將世界盃改為每兩年舉辦一次，4年內將增加約44億美元 (約343億港幣) 收益:

• 若世界盃由2026年開始，擴充為48支球隊決賽周，門票收入、媒體轉播權以及贊助商收入，將由70億美元增加到114億美元，增幅超過60%
• FIFA於4年前成立，約35億美元嘅「團結基金」，估計可以向每個成員協會撥款約1600萬美元。

FIFA 聲稱，計及其他收益，佢哋可以向屬下共211個成員協會，派發約1900萬美元 (約1.4億港幣) 額外收入。

對於窮國及小型地區，呢筆收入當然極為吸引，如果運用得宜，絕對有利推動足球發展。而非洲足協 (CAF) 亦已表明支持 FIFA 建議。

歐洲南美大力反對

FIFA嘅如意算盤，雖然得到非洲成員國支持，但足球發展相對發達嘅南美同歐洲國家，已表明反對。

歐洲足協 (UEFA) 早前發表報告，預測世界盃改為兩年一屆下，UEFA 將減少約28億至34億美元收入。此外，世界盃賽事變得更頻密，由外圍賽到決賽周賽事數目將大為增加，會大大影響本土賽程，亦令球員更少休息時間。南美足協 (CONMEBOL) 亦支持 UEFA 嘅立場，因為南美正在籌組超級聯賽，兩年一屆嘅世界盃將影響計劃。

對球迷嚟講，世界盃變成兩年一屆又係咪好事? 搞得太密唔再矜貴，大家自然唔再覺得佢係盛事。

資料: CNN