來自威爾士南部嘅 Amelia，今年代表所屬球會 Gurnos FC，一個球季錄得143個入球，成為神射手。有人仲將佢同今屆英超神射手，有「魔人布歐」之稱嘅曼城球員夏蘭特比較。
Amelia 本身玩開自由搏擊，去年於卡迪夫城一個國際自由搏擊賽，橫掃四面金牌。爸爸為培養佢有多方面發展，鼓勵佢參與唔同運動，仲加入當地足球隊。點知 Amelia 喺加入嘅第二個球季，就已經盡顯運動潛能，一場波閒閒地可以入十幾球。教練為咗畀多啲機會其他球員以及對手，大多數時間都會喺半場將佢換出。
佢爸爸話 Amelia 有咁突出表現，只係得一個原因: 就係努力不懈。Amelia 每日放學第一件事都係換波 boot 落球場練波。而 Amelia 亦希望可以成為職業球員，加入利物浦女子隊。
資料: BBC
張伯倫
自細肥仔一名，後來因發現患有脂肪肝，決心多做運動注重健康，曾參加並完成毅行者，關注所有健康資訊。