秋風起最啱去郊遊遠足,近日有啤酒牌子就以「啤住行山」做口號,叫大家行住山啤啤佢。不過,呢個講法有好多行山愛好者都激烈反對,事情引起一番熱議。

飲酒影響行山運動

反對者最普遍講法,就係酒精可嚴重影響身體協調能力、注意力、判斷力以至腦力神經系統,所以各國都大力打擊酒後駕駛。同樣道理,飲醉酒行山亦容易發生意外,如果行經危險地帶,後果不堪設想。

此外有研究指,飲酒後會降低體內蛋白質製造,以及限制肌肉攝取葡萄糖,直接影響運動能力。而最值得注意,就是酒精有利尿功能,會令人「蠢蠢欲尿」。一杯酒可令身體排出三至四倍水份,而體內嘅鹽、鉀亦會大量流失。所以行山、做運動時飲酒,如果唔及時補充足夠水份及礦物質,亦會影響運動表現,甚至出現頭痛、嘔吐等症狀。

韓國人行山飲米酒

飲酒雖然不利行山運動,不過亦有唔少人行山時鍾意飲番兩杯。以威士忌聞名嘅蘇格蘭,當地人登山時都會帶備威士忌,用以驅除寒氣及放鬆身體。蘇格蘭傳統行山杖亦有專用裝置,可以掛上酒樽方便飲酒。

而鍾意飲米酒嘅韓國人,亦鍾意行山時飲用一款叫「馬格利」嘅米酒。馬格利酒 (막걸리) 酒精含量6%至8%,同啤酒差唔多。不過熱量高,可以有禦寒及補充能量作用,所以深受韓國人歡迎。

不過,近年因為韓國太多人上山飲酒,留下太多垃圾。而飲醉酒嘅人對行山人士造成嚴重滋擾,於是當局近年已立例,於所有國家自然公園(國立公園、道立公園與郡立公園)全面禁酒。違法者首次犯案將會被罰5萬韓圜,再犯者將會把罰款提升至10萬。

呢啲米色嘅就係馬格利酒

喺唔影響別人,唔污染環境嘅條件之下,飲酒全屬個人自由。而且,行完山飲番罐啤酒,不失為一個獎勵自己嘅好方法。

資料: 衛生署新聞雲


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 「啤住行山」係咪靠害? 韓國經驗值得借鏡