----- 廣告 Ad -----
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78kopening.jpg?resize=760%2C570&ssl=1)
圖: 筆者
引言
「終點喺邊呀?」
「前邊第2個燈口位轉左就到呀啦,400米左右就到!」
最終聞到陣陣BBQ味,確認終點就眼前! 然後憑著最後一口「貨」,直奔終點,終於以15小時57分鐘完成,男女混合隊第7名。
首先筆者係以最大嘅勇氣參加「雷利衛徑長征」,之前最長嘅山賽都係 Translantau 50K,呢個決定可以話係心口掛住個勇字! 賽前受颱風「山竹」影響而改賽道,對於 CP8 後路段感到非常陌生,係無試過路情況下,就直闖華山!
----- 廣告 Ad -----
話晒都第1次玩咁長途山賽,兼玩2人隊制,無論心理同生理都需要有好好調整。我地十卜位置分別係獅子亭同鶴藪水塘。但諗番喺鶴藪水塘十卜位太後,要經過九龍坑山嘅「磨練」再兜兜轉轉先跑到鶴藪水塘,到咗十卜位大家體力同精神消耗得好大,過程係肉體同意志力嘅拉鋸戰,所以最好應該喺太和站置十卜位同大抖好啲! 加上男女體力上係有啲唔同,所以係賽前都抽咗時間去練習,好彩筆者都勉強跟到隊友嘅步伐!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k01.jpg?resize=760%2C570&ssl=1)
朝早8點左右到咗起點,登記、bag drop之後,就開始熱身,準備賽事。圖: 筆者
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k02.jpg?resize=760%2C507&ssl=1)
精神奕奕咁開始我地嘅雷利長征。圖: Run-Pic
港島拉鋸戰
第1、2段我地都以正常速度,留住啲貨等到過一半後段發力,點知賽到近渣甸山果時,遇到玩接力嘅外國參賽2人隊,喺互相「你過下我果時、我又過下你」情況下,跑到果時時段混合組排名第2,但呢個 moment 筆者對腳開始爆爆地,之後上油塘澳景路變得好慢。呢個故事話我知唔好比其他參加者影響自己 pacing!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k03.jpg?resize=510%2C680&ssl=1)
我地同外國接力隊制參賽者角力中 圖: 筆者隊友
----- 廣告 Ad -----
![](https://i0.wp.com/fitz.hk/wp-content/uploads/2018/10/一場意志角力賽-初嚐雷利衛徑長征78k-04a.jpg?resize=750%2C730&ssl=1)
當時同外國接力隊拉鋸,喺搭去油塘時發現我地排名
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k04b.jpg?resize=760%2C478&ssl=1)
準備上山啦! 圖: Run-Pic
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k04c.jpg?resize=453%2C680&ssl=1)
好努力咁上樓梯中。圖: 運動筆記
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k04d.jpg?resize=468%2C680&ssl=1)
行得幾辛苦都好,對著鏡頭都要笑! 圖: 運動筆記
失利獅子亭
拖著爆爆地嘅雙腳,過埋井欄樹呢個 Check Point,便直上飛鵝山道去沙田坳,行呢段飛鵝山道斜路不停同自己講要快啲快啲,因為我地個十卜位就係獅子亭,有熱辣辣嘅菜肉包、香菇包、燒味飯,同埋對於筆者補充糖份最重要嘅食品 — 豆腐花一盒。衝落去獅子亭嘅時候,成個腦淨係諗著我盒豆腐花,因為果時大脾開始出現疲態,好想去到十卜位抖下!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k05.jpg?resize=760%2C570&ssl=1)
神之補給「豆腐花」,食完之後簡直回神呀! 圖: 筆者
不過有段小插曲,話說我地2位都各自出現疲態,諗著去大會嘅急救站貼番張 tape 同按鬆番繃緊嘅肌肉,我地到埗果時急救站先啱啱開始 setting,喺果度擾攘咗一段時間,結果前前後後喺獅子亭留咗大概30分鐘,再上路嘅時候心知不妙,要追番過咗我地嘅參賽者真係要出多幾廿倍力先得! 好彩嘅係行熟悉嘅M5,呢段路不停「追追趕趕高高低低深呼吸然後……」繼續跑囉! 都咪話唔辛苦,頭段都用咗唔少力水去搶時間,就係獅子亭呢個十卜位抖耐咗,結果無咗唔少時間,所以每個十卜位置同 Check Point 位要好好控制時間,唔係就好似我地咁追到氣都咳!
師兄的愛
話分回頭,雖然話辛苦咁追,途中識到位好好人嘅參賽者師兄,提點我地點樣跑同埋有咩策略咁,一直帶到我地去大埔公路呢個站。邊個話賽場上無朋友,因為呢位師兄我地先可以拉近番前邊參賽者距離,到咗大埔公路個 Check Point 師兄再三叮囑我地要小心啲補給比馬騮搶走。佢真係好好,仲叫我地比機心拎個奬(我地盡左最大努力,都拎唔到奬! 但好感激呢位師兄呀!)
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k06.jpg?resize=760%2C480&ssl=1)
左邊師兄真係好好啊! 由M5中段開始一直 guide 住我地速度! 唔講唔知,佢已經年屆60,好佩服佢啊! 圖: 運動筆記
去到城門水塘 Check Point,吸收獅子亭嘅教訓,停10分鐘左右,帶好頭燈同斟水,就繼續路程「啪針隊草」。點知! 不幸事情再次發生喺筆者身上,就係筆者條 Garmin 叉電線跑到跌咗,呢鋪真係呢?! 你話為比賽可以去到幾盡呀! 果下真係「意志消沉」,加上針草真係消耗晒筆者所有意志,唯有中途食下鹽糖,嚟個「苦中一點甜」嚟安慰自己! 一直堅持到元墩下Check Point,諗番果時體力消耗到一個極緻,對腳攰到痛,基本每個Check Point位都需要噴運動止痛噴霧先可以捱到落去!
----- 廣告 Ad -----
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k07.jpg?resize=760%2C570&ssl=1)
CP7果時已經夜晚7點幾 (其實都已經唔係太知咩確實時間)只係知道去到呢度,就好開心,因為距離我地十卜不遠! 圖: 筆者
九龍坑山發脾4
話說筆者上完坑山,已經爆到一個極點,只冀盼鶴藪水塘的十卜! 坑山果條瘋狂嘅樓梯,果條又長又斜嘅斜路,果下筆者已經近乎臨界點,對腳攰到核爆,但依然要追趕時間!呢個 moment 真係隊友間嘅考驗,食粥食飯就睇鋪啦! 本著4條腿1條心,就算幾唔想 jog 都好,隊友話 jog 埋佢、頂埋佢! 結果都係頂埋落去….
係華山期間,眼見一位師兄體力透支,又嘔又攰,細問之下原來佢其餘啲隊友捨他而去,聽到都覺得好灰! 所以筆者好感恩隊友對我不離不棄,筆者知道隊友想爭取時間,拎最好嘅成績,但無奈筆者能力有限,而隊友係無放棄過筆者,滾動啊!
鶴藪十卜
拉鋸咗咁耐,我地終於到咗鶴藪嘅十卜,那時已經10點有多。
去到呢度真係身心疲憊,淨係好想快啲飲我 request 嘅味噌湯同食滷水雞脾! 呢個 Checkt Point 雖然大會補給好足,但都不及自己朋友帶嘅愛心十卜嘢食同飲品,再加上神級嘅按摩,一場長途山賽,缺乏按摩真係無辦法頂落去,筆者好多謝嚟十卜嘅朋友,山長水遠咁入嚟鶴藪,補給一大輪後,就到咗賽程最後段嘅華山!
呢段路真係毫無頭緒,事前亦無任何試路! 呢個moment筆者同隊友都進入咗睡眠狀態 mode,邊打醉拳邊咁上華山,喺華山入邊上上落落好多次,多到連自己都質問自己究竟幾時先會到終點! 一路恰眼瞓一路龜速咁上斜落斜,眼見不少參賽隊都追到我地前面,果時我地已經做最壞打算,「唔埋排名第幾,只要我地做到我地想要嘅時間,就問心無愧!」山賽年年都有,唔急在一時因為一時意氣追時間,傷咗自己對腳?!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k08.jpg?resize=760%2C760&ssl=1)
鶴藪十卜位嘅補給,我地知道呢個位置真係遲咗。但無有怕嘅,最重要係按摩膏同嘢食啫! 圖: 筆者
落到山,聽到話仲有400米左右就到終點,呢下真係有眼濕濕! 78K呢個路程真係唔簡單,有血有汗,加上雙腳同膝頭已攰到痛到不能,但每次可以jog到嘅,都同自己講捱埋佢,因為報得就要完成,痛都要 jog 返去,最後都係大家理想範圍時間內完成賽事!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k09.jpg?resize=510%2C680&ssl=1)
終於衝過終點! 圖: 筆者
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k10.jpg?resize=760%2C570&ssl=1)
我地這一team! 圖: 筆者
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k11a.jpg?resize=760%2C507&ssl=1)
衝線果時真係有眼濕濕呀! 圖: 運動筆記
----- 廣告 Ad -----
![](https://i0.wp.com/fitz.hk/wp-content/uploads/2018/10/一場意志角力賽-初嚐雷利衛徑長征78k-11b.jpg?resize=750%2C694&ssl=1)
第一次玩80K,呢個排名真係意料之外! 圖: 筆者
後記
經過一場長途山賽後,筆者深明一個道理「咩都好! 每個 Check Point 一定要好好小休片刻同按摩!」咁長途山賽,雙腳肌肉繃緊,如果每個 Check Point 位置都無好好 Plan 下紓緩肌肉或者按摩時間,其實好易受傷! 不妨比賽當日、賽前及比賽中途都用適量嘅運動按摩紓緩膏,係比賽期間肌肉更能有效發揮最好作用。同時,個個都為比賽果時著對 Calf 係會好啲,但事實話番比大家知,賽後著番對 Compression 嘅 Calf 瞓覺先至發揮到佢地作用! 唔信?! 你地可以試下,筆者開頭都唔信,但今次雷利之後試左咁做,覺得小腿第二日就無咁痠痛!
不過都係果句,每次咁長途山賽,大家都要做番足拉筋嘅動作去紓緩腳部肌肉痛楚!
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k12.jpg?resize=760%2C570&ssl=1)
按摩高或者紓緩噴霧係長途山賽入邊有好重要角色。圖: 筆者
![](https://i0.wp.com/fitz.hk/wp-content/uploads/2018/10/一場意志角力賽-初雷利衛征78k13.jpg?resize=760%2C570&ssl=1)
賽後筆者著左2日 compression 襪,小腿先無咁攰! 圖: 筆者
Fitz連結: https://fitz.hk/?p=105459
Fitz Facebook專頁
[Plogging-夠Green沒有?] 跑著救山徑 下回再接再勵
[一期一會] 立山黑部阿爾卑斯路線 開山之美
電兔小玉@Fitz