圖: Flash Media Hong Kong

2020年2月9日,原本舉行嘅香港渣打馬拉松,因疫症威脅被逼取消,唔知有無關係,唔少人都去咗行山。呢日中午,我山雞陸續收到唔少山友嘅報告,不約而同話幾條熱門山徑已經人滿為患,比市區更為逼人。

山徑擁擠情況

根據我山雞多方面收集消息,包括朋友報料、網上討論區,發現幾條熱門山徑不勝負荷:

  • 城門水塘 (主要係環塘衛徑、菠蘿壩一帶)
圖: 香港突發事故報料區
圖: 香港突發事故報料區
圖:香港突發事故報料區
  • 鶴咀一帶 (包括龍脊)

  • 大帽山道
  • 西貢北潭涌一帶山徑,包括萬宜路 (麥徑一)
  • 鹿頸往谷埔、荔枝窩
  • 八山嶺大美督一帶

有啲要上山嘅路段 (如針山) 甚至出現「一人企一級」嘅上山塞車嘅現象。山徑如此多人,有山友話行山都係為咗避開疫症,而家反而感受到病毒威脅!

惡劣行為要不得

行山活動普及,本來值得高興,不過多咗人突然參與一項活動,不其然帶來好多問題。

  • 亂丟口罩,有如將郊外變成病毒溫床
圖: WL
  • 立亂生火、食煙。污染空氣,引發山火
  • 非法泊車,令公共車輛、行人大受影響
  • 亂拋垃圾。現時郊野公園山徑已不設垃圾筒,行山人士必須將垃圾帶落山。其實唔止行山,露營朋友亦經常投訴營地污糟不堪

早兩日漁護署亦因污水設施淤塞,要封閉鶴藪營地公廁:

避開人潮重要過睇靚景

人多行山最大問題,唔係靚景被人霸住無得打卡,而係山徑太逼人,反而容易傳播病毒。有人問,太多人行山係咪要戴口罩? 我山雞唔係病毒專家,但我都有同一疑問。不過,行山都係為咗一舒身心,戴住個口罩行山不如唔好行。

反而我山雞想提醒大家,香港地方唔算大,勝在多山、多山徑,勝在區區有山行。大家何需去熱門山徑同人逼?

所以,我山雞呼籲,為咗抗疫,大家唔使搭長途車同人逼一啲熱門山徑,大可留返喺自己嗰區,搵條晨運徑輕鬆走一轉,免卻逼車逼船仲方便!

> [行山路線] 6條藏於民居的行山徑

有感而發: 香港人,好苦

一窩蜂行山,造成山徑污染、交通擠逼,責任未必係行山活動嘅問題。正如有人一窩蜂去買廁紙、買米、買漂白水、買酒精、買梘液、買口罩,其實都係大家面對生命威脅嘅自然反應。大家出於保護家人,保護自己,以合法方式爭奪最大利益,絕對係人之常情,無可厚非之至!

疫症可能係大自然製造,但係疫症帶來嘅災難肯肯定係人為。

政府把關不力,任由疫區高危人士自出自入香港;醫護裝備不足,卻要求前線人員捱義氣死撐;全球口罩不足,竟然任由黑心商心抄賣發國難財,基層小市民難以負擔;疫症隔離營選址,只考慮度假營、公屋的民用設施,但官方嘅少年警訊訓練營、警察宿舍,甚至軍營,通通不作考慮。

病毒足以致命,但人為嘅災難更足以滅絕大家對未來嘅信心。

香港人,自救。


文章為作者意見,不代表Fitz立場。

歡迎投稿: http://fitz.hk/contribute/

山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。