鄺神與蓮姐 圖: 鄺俊宇kwongchunyu Facebook

上周末山界突然傳出驚人消息,大帽山茶水亭突被知會租約已滿,要重新招標。

消息引來各方揣測,有人覺得係大財團出手,要侵佔小商戶嘅生意; 有人又相信係政府借租約為名,趁機審查為實; 甚至有荃灣新任區議於 Facebook 發帖,話蓮姐將於月底結業! (帖子已經刪除)

有媒體喺星期一終於搞清楚情況漁護署轄下嘅大帽山、大欖、西貢、香港仔及城門郊野公園小食亭,租約將於2020年1月31日屆滿,幾個小食亭將作公眾招標。以往經驗,這類小食亭一般都是自動續租,亦即檔主肯繼續營運就會直接續約。參考漁護署網站,暫時仲未見有相關嘅招標公告,今次流出蓮姐仍未續約及擬作公開招標嘅消息,實在很難令大眾釋疑。


參考康文署海灘小食亭招標文件,入標者要保證小食亭要符合水、電、建築等一般條例,食物要衛生、環境要潔淨等,在價高者得嘅情況下,先有機會中標。本來,商業社會用呢啲準則去檢視租約確實無可厚非,不過蓮姐於大帽山開業逾20年,唔少人都覺得漁護署仲應該要考慮以下條件:

  1. 中標者要關注環境保育。蓮姐嘅小食亭就設斟水服務以減少膠樽,她本人亦支持不少環保活動。
  2. 中標者要推動越野賽或行山活動。遇有比賽途經大帽山,蓮姐都會延長服務時間。每年樂施毅行者茶水亭更24小時營業。
  3. 中標者要保證提供優質服務。蓮姐與不少山友、單車友打成一片,地位無可取代。
暫未見漁護署招標文件,上圖為康文署小食亭招標資料。

事實上,蓮姐茶水亭「被招標」消息一出,好多山友都大表擔憂,有人甚至話「無蓮姐嘅茶水亭我一定唔會幫襯」; 有山友更發起「十萬聯署撐大帽山蓮姐」簽名運動,話會將相關意見交畀漁護署,要求佢哋同蓮姐續約。

當現今政府越來越少講人情,各位支持蓮姐嘅朋友更要加大力度集氣。至於另外幾個小食亭大家如何支持呢? 大家不妨喺 Facebook 留言討論。

大帽山茶水亭 Facebook 專頁


文章為作者意見,不代表Fitz立場。

歡迎投稿: https://fitz.hk/contribute/

廣告
朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。