無論居家定旅行,五金舖都可搵到啱用嘅嘢。

戶外用品唔一定要去跨國連鎖站,買外國名牌,啱用就得!只要動下腦筋,好多五金用品,用嚟行山露營,其實都好好用。

1. 防滑手套

一對價值30蚊嘅「勞工手套」,絕對抵得上百幾二百蚊專業級行山手套。除咗防滑、具保護效能外,要篤手機時亦唔使除低,非常萬能! (呢款手套分幾種唔用途,有啲防滑,有啲防切傷,有啲耐火,睇清楚先好買。)

2. 防水噴膜

事發喺2016年渣打馬拉松前夕,天氣預佈比賽當日落大雨,於是有人四出搵方法令跑鞋唔入水。呢個想法當然唔實際 (因為著對防水鞋跑步會焗死)。不過一時之間,就令到呢支嘢大熱。

防水噴膜可以用嚟修補背囊、帳幕等裝備,當呢啲裝備內層一層防水層脫落,用呢支嘢噴幾噴,隨時可以救番個裝備,唔使咁快要換新。佢除咗防水外,而家新出嗰啲仲話可以防 UV、防潮、防霉…… 真係試過先知掂唔掂。

3. 膠索

可以說係居家旅行必備,用嚟綑綁、修補,一索就得,用途多到講唔晒。

4. 反光帶


行夜山超強裝備,只要有少少光源 (例如月光)就足夠令佢發光,睇到同伴。部份五金舖有反光衣賣,亦會有呢啲反光帶賣。

5. 鞋套

行過毅行者,喺第二段要行落大浪西灣,一定經歷過幼沙入鞋嘅痛苦。呢款鞋套可以阻撞啲沙經由鞋面入腳,未必阻得晒,不過都應該可以一用。

有人問,點解五金舖會有鞋套賣?裝修師傅入新屋,唔著個鞋套咪要踩污糟個客嘅純白地氈囉!

(按: 鞋套、膠索屬即棄用品,會製造垃圾,都係少用為妙)

其實五金舖仲有好多好嘢,好似話俗稱「豬腸」嘅冷氣膠喉,可以用嚟改良背囊嘅軟墊。去五金舖買鋁通,又可以維補爛咗嘅營幕支架。

而且,香港嘅五金舖絕大多數都係小本生意。

大家支持小店嘅話,不妨得閒落舖頭搵下仲有咩寶藏!

Fitz連結: https://fitz.hk/?p=104753


更多:
Fitz Facebook 專頁
[唔係萬能] 世俗人對山友的5大誤解
[難聽過粗口] 約人行山 8個令人最O咀的回覆
[週末短遊] 紅香爐峰 觀日落之好地方
[Kill標要知] 標高柱的實際用途
Fitz Hiking 行山

其他文章:

文章為作者意見,不代表Fitz立場。

歡迎投稿: https://fitz.hk/contribute/

廣告
山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。