司馬庫斯

咪以為科技發達,就可以屏除傳統工具。就好似話今時今日人人手機跟身,行山可以用手機求救。不過,傳統裝備「哨子」,行山時一樣有用。

早兩日台灣有對母子,去到有「新竹秘境」之稱嘅「司馬庫斯」,呢座山高1500米,位置相當偏僻,山上住滿泰雅族原住民。母子二人去呢處行山,一時興起打算離開主路行捷徑,行咗幾公里後發現迷途。好彩手機仲有訊號,媽媽就致電報警。

警察出動上山搜救,發現範圍非常廣闊,就算佢哋同母子 keep 住通訊,都無法確認位置。呢個時候,其中一個警員就好醒目吹響哨子,迷路嘅母子聽到哨子聲亦有所回應。就係咁,警察好快搵返佢哋。

司馬庫斯

總有哨子喺左近

雖然現今科技進步,但係行山三寶「地圖、指南針、哨子」仍然不可或缺。事實上,而家嘅行山背囊大多有埋哨子,你唔使專登去買,都應該有隻哨子跟身。

山藝課程裏面,對哨子同以哨子求救,都有一定法則:

  1. 哨子要夠響亮,聲音可達一至兩公里
  2. 吹響哨子目的,是引旁人注意,可以是迷路、受傷,甚至遇賊等情況
  3. 求救方法: 1分鐘內,發出6次訊號,停頓1分鐘後,再次重複,直至救援人員到達
  4. 聽到吹哨求救回應方法: 1分鐘內,發出3次訊號,停頓1分鐘後,再次重複,直至見到求救者為止

既然哨子咁有用,下次行山就帶埋啦。

新聞資料: 民視新聞網


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。