行山友經常被人誤解,有啲人仲以為行山友係超人。以下講法,係山友間集思廣益而來,大家睇完唔使喊。

1. 「同我殺咗隻曱甴佢!」
由老婆至老友,都以為行得山多,見得多蛇蟲鼠蟻,就以為我哋乜嘢核突嘢都唔驚。我哋見得多,唔代表唔會怕!

2. 「喺山上面你又搵到路,行東京你竟然唔識路?」
去旅行,最怕遇到啲朋友「用到盡」,更加怕有人以為山友會識睇地圖,會有方向感。山徑有路牌,有標距柱,東京街頭,就算有路牌都係日文,更何況人生路不熟,我哋真係有人肉GPS咩?

3. 「前面呢座山叫咩名?你唔係唔知呀嘛?」
香港幾百座山,唔識有幾奇?更何況唔係每一位山友都會對山有研究,行山友都分好多種,有啲鍾意睇古跡,有啲鍾意睇風景,有啲鍾意齋行。世間事唔使乜都要識呀嘛。

來源: Simon Po @蚺蛇尖

4. 「呢粒星叫名?乜你唔係夜晚行山嘅咩?」
你估以前啲水手要靠睇星搵方向咩?!行夜山當然要欣賞下星空,不過唔一定會對星星有研究囉。

長沙 (圖: 坐井會)

5. 「乜你唔係鍾意行山嘅咩?點解仲係咁肥?」
行山有益身心,不過唔係減肥嘅好方法。同埋,大多數山友都好食得,行嗰10公里,隨時食番20公里返嚟!

大家對於呢啲誤解,其實都無謂動氣丫。正所謂「山友有愛」,就發揮大愛嘅精神囉。



更多:
Fitz.hk Facebook 專頁
[難聽過粗口] 約人行山 8個令人最O咀的回覆
[週末短遊] 紅香爐峰 觀日落之好地方
[Kill標要知] 標高柱的實際用途
Fitz Hiking 行山

分享
山雞

十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。