塔門大草地經常引來無數遊人駐足紮營

抗疫避災唔一定要學古人咁重陽登高遠足,香港人放假留多幾日喺屋企係唔駛死嘅,但係因為一場人為災難而令其他本來無事嘅大自然環境同野生動物無辜受災,咁我哋嘅行為又同嗰啲嚮往自由自在唔肯戴口罩四圍播毒嘅白痴有咩分別?

作者: 《搞走塑》及《正澳》戰友 Leo Mak

尋日復活假第一日估計好多郊區都同其他熱門景點一樣,無可避免會成為假日「放監」港人嘅復活避災勝地,依日難得好天再次嚟到塔門依個小島淨灘,目睹遊人喺大草地跑吓放吓狗放吓風箏飲飲食食影吓相,困喺間屋道太耐唔自在就嚟草地上紮個營hea吓,除曬口罩四人以上聚集玩吓笑吓暫且擺脫城市嘅約束實在係賞心樂事…

可惜喺過程中難免會產生唔少食品即棄塑膠包裝和餐具,大部份人食完飲完當然想即時棄置,膠樽膠袋膠飯盒隨處可見,但最留意依啲垃圾嘅係喺嗰道生活嘅野生動物,佢哋除咗識得食草仲會好醒咁喺垃圾堆中摷食物維生,當然佢哋係唔會識分邊啲食得邊啲食咗會長年塞喺個胃直至佢再食唔到嘢死咗都唔會有可疑,因為根本無人會理一隻新界嘅牛嘅死活。

無錯,新界隻牛食膠食到死可以唔關你事,但個海食膠食到就嚟缺氧令全球氣溫上升就實關你同我嘅事,啲海洋垃圾邊道嚟?真係登島玩樂嘅人先至會為大自然環境帶嚟垃圾嗎?當然唔止。

記得前年「山竹」過後塔門弓背灣依道嘅破壞實在慘不忍睹,唔單止係超強颱風吹斷咗幾多棵樹咁小事,而係岸上堆積嘅垃圾個厚度相信係永遠都無法清得走,依日所見當年沖咗埋山邊嘅海廢依然健在,好彩嘅就可以俾路過嘅義工見到執起佢,唔好彩嘅就深藏不露喺底層成為大自然嘅一部份,被好蠢嘅海洋生物或植物當成食物或宿主,從中吸收「養份」。

其實環境唔健康,受災嘅最終都係我哋人類,我哋係係想逃避一場災劫同揾返久違嘅自由,但同時卻因此而為其他地方帶嚟災禍,唔一定係強國人入侵先會咁我哋香港人佔嘅比重都實在唔少,依方面竟然可以從現場收集到嘅垃圾作品牌調查後粗略估計到出嚟。

弓背灣石灘嘅埋便三月時新樹立嘅「海廢監察鏡頭」

牛牛食草嘅石灘上無錯上個月先set咗支監察鏡頭mon住海岸垃圾嘅情況,但遊人嚟到享樂後產生嘅又點樣控制?無㗎!只能自律,棟個木牌勸吓大家「自己垃圾自己清」又或者等下次有人嚟自發清理先可能有所改善,只不過此等偏遠地帶,你咁遠帶垃圾嚟棄置就唔係咁容易運離個島送去堆填,帶走嘅一係就當地摷食物嘅野生動物食落肚,一係就被強風吹走或岸邊扯返落海,再二次污染其他更偏遠嘅地方,繼續將災難轉移到另一個大家眼不見為乾淨嘅環境來承受,而塔門只不過係成個地球村嘅縮影,難道地球很危險我哋就有能力可以快快回火星去嗎?

真係迫住要即場棄置嘅話垃圾至起碼要放入綠色桶內,爆咗或太大嚿都應該放喺垃圾站範圍內或堆於較高位置,以免垂頭揾食嘅牛牛破袋摷食物就是。(圖中綠色集運袋為當日淨灘海廢)

災害無論係有形定無形抑或係「新型」都好,真係一次都嫌多更何況係經自己將禍害擴散開去,其實過程中好多起因我哋都係可以避免嘅,例如減少不必要嘅日常消費行為,盡量唔買唔用即棄塑膠包裝嘅飲品同食品,即使買咗用咗都唔好隨意棄置堆填應考慮回收或重用,皆因現場執到嘅所有即棄物品其實大部份本來都係可回收嘅「不是垃圾」,即使佢只不過係一個膠樽膠袋發泡膠還是紙包盒。

如此這般依方面實在需要我哋自覺受災中嘅人類深切反思一吓。

原post: Tai Po 大埔 Group


文章為作者意見,不代表Fitz立場。

歡迎投稿: http://fitz.hk/contribute/

郁民轉載
由港九新界,以至地球每個角落,為你搜羅郁民好料,一一呈現大家面前。