圖: 貢想 Vision Sai Kung

塔門草地沙漠化,令島上生活多年嘅牛牛無草食。不過,有人反駛話:「啲牛明明有個大肚腩,即係好食好啦。」無論人或者牛,有肚腩唔代表身體健康!

關注郊野環境生態嘅 貢想 Vision Sai Kung,訪問過幾位牛義工,了解塔門牛嘅真實情況。佢哋話,塔門牛嘅大肚腩其實係「垃圾肚」,因為塔門有太多人去露營、行山,引致草地受到嚴重破壞,塔門牛牛無草地,就唯有周圍搵嘢食。

牛牛會走向發出食物氣味嘅地方 (通常係營地),然後會將遊人留下 (或餵飼) 嘅食物放入口,包括麵包、雞翼、棉花糖。久而久之,有牛義工話,最近塔門嘅牛牛見到草都唔識得食!

牛牛食慣咗麵包、棉花糖之後,就會自然走去搵垃圾食,佢哋會連埋食物嘅包裝膠袋食落肚,所以塔門牛牛就有個大肚腩,入面有好多消化唔到嘅膠袋,長此下去會因營養不足而死。

佢哋提出,我哋去郊野露營行山,記謹要遵從「護牛九式」。

護牛九式

  1. 包容牛便: 牛便便 (牛屎) 係草嘅養份,見到牛屎唔好理佢,有得留喺草地上。
  2. 勿打牛、勿嚇牛: 牛係溫馴動物,唔會主動攻擊人類。
  3. 勿摸牛B: 母牛聞到牛BB有人類氣味,係唔會再餵哺佢。牛BB如果飲唔到牛媽媽嘅奶,係會餓死的。
  4. 勿餵牛: 牛應該只係食草,唔應該食人類食物,更加唔應該食雞翼豬扒,甚至牛扒!
  5. 帶走垃圾: 拎幾多嘢去露營行山,就帶返幾嘢出市區。記得將垃圾帶離郊野至有馬路嘅垃圾桶、垃圾站。
  6. 保護草地: 營友離開時至少將4至5公升清水淋於紥營嘅草地。更加唔好燒草地,BBQ、煮食要用爐架或煮食枱。
  7. 收好食物:不要將食物、膠袋、垃圾隨處放,盡量放入營帳內,並拉好雙拉鏈,避免牛牛誤闖吃人類食物。試想假如每個營帳吃一個膠袋,日復日,牠們真的會死。
  8. 保護牛牛: 發現有人虐打牛牛,請出面干預,並提醒佢香港有法例保護所有動物 (169條例),一旦觸犯法例,可被罰款20萬元及監禁3年 。
  9. 勿亂post牛相: 唔好公開牛BB相,3歲以上成年牛牛先好出,以免被有關人士強行帶走。Post 相麻煩遮耳牌,唔好標籤亦唔好明星化佢哋。
圖: 貢想 Vision Sai Kung

資料: 貢想 Vision Sai Kung


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 塔門牛牛無草食 點解會有大肚腩?