聖誕新年前後,元朗大棠都要人山人海,人人都湧去睇紅色嘅楓葉。上圖嘅景況係一個平日要返工嘅朝早,遊客多到咁,公眾假期真係唔敢想像有幾逼人。

其實,市民鍾意去郊遊絕對值得讚賞。雖然話行去「楓香林」唔算好遠,但大家肯去郊外吸下新鮮空氣,都係一件有益嘅事。

之不過,山雞當日由河背向大棠方向行,路經紅葉景點,就發生一件唔好開心嘅事。

時近中午,大批遊客步行離開

由於呢條路係越野單車徑,偶而會有啲單車友踩車。當時我就聽到有人大聲叫:

「唔該唔該唔該,有單車落緊山呀!」

去過楓香林嘅朋友都一定知,嗰一段路應該斜過梅子林,甚至仲斜過香港最斜嘅行車公家路西邊街,單車喺上面衝落山,無論對車手以至途人,肯定好很危險!

而當時,唔少遊客都企喺路中心影相。

行到出漁護署管理站,睇到呢一幅一直被忽視,又其實好重要嘅宣傳橫額。

其實,好多郊野公園道路都係多功能,既係行人,又會行車,有啲仲係單車徑。而且就算唔係有汽車、單車,遊客之間嘅步速亦會唔同,所以無論係咪企喺路中心打卡,定係優哉悠哉慢步,都需要顧及其他道路使用者。呢次係因為有路人一字排開六個人,霸住成條馬路慢慢行!

呢次好彩雖然無發生意外,不過聽到嗰位咁車手咁勞氣,被責怪嘅遊客又唔多開心,就影響大家郊遊嘅雅興了。

大棠一帶是合法的越野單車徑

文章為作者意見,不代表Fitz立場。

歡迎投稿: http://fitz.hk/contribute/

山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。