辛苦行嚟志在食，不過都唔好亂帶食物行山。絕對無吹水，以下呢啲食物我真係親眼見人帶過、食過。特別喺大熱天時，真係要小心病從口入。
1. 壽司
壽司嘅飯、紫菜，輕便又唔易變壞，絕對適合帶去行山。不過，如果有肉類嘅壽司，無論係三文魚、鰻魚甚至係豬扒，真係要小心變壞。特別係魚生，上面嘅細菌一離開雪櫃就開始滋生。買完行上山，斷估都隔幾個鐘，變壞一啲都唔出奇。
2. 糯米雞
糯米雞曾經係我冬天去露營嘅指定食物。因為一隻糯米雞，有肉有菇有蛋有糯米，絕對等於一餐飯。不過，夏天行山真係唔好試，佢除咗容易變壞之外，糯米亦唔易消化。行山做運動已經消耗身體大部份能量，腸胃呢個時候未必頂得住。況且，民間智慧話糯米容易引發抽筋，都係少食為妙。
3. 薯仔沙律（連醬）
薯仔係高能量食物，做運動食都唔錯。不過加埋沙律醬嘅話，都相當唔適合喺夏天帶去行山。原因係沙律醬有酸味，萬一變壞咗你係食唔出。要食沙律嘅話，就唔好落醬咯。
----- 廣告 Ad -----
4. 朱古力
朱古力喺山上，畀炎夏嘅驕陽曬住，唔溶都幾難。當然，溶咗嘅朱古力其實可以食落肚，但感覺上就……我覺得好難頂囉。
5. 罐頭
絕對親眼見過！喺梧桐寨瀑布，有人拎罐大號午餐肉出嚟，整餐肉治！當然，嗰一刻我睇到都流晒口水，但諗起佢要孭住罐成公斤重嘅罐頭上山，我就情願落山先食碗餐蛋麵咯。
6. 各式三文治
夾喺三文治入面嘅饀料，無論係蛋、火腿，以至蔬菜，時間一長就有倒汗水。我嘅做法係食果占、花生醬包（唔好烘底）。
7. 獨立包裝蛋糕/餅乾
食蛋糕餅乾當然無問題，有問題嘅，係佢哋啲包裝。除咗要製做大量垃圾，仲無端端增加負重，為乜？
----- 廣告 Ad -----
更多：
Fitz.hk Facebook 專頁
[興烚烚] 炎夏行山救命法寶
山雞@Fitz.hk
Fitz Hiking 行山
