有山友拿取四方亭的蒸餾水為自己補給 圖: 香港行山遠足之友(吹水山谷）
臨近樂施毅行者活動，同往年一樣，沿途路線已開始設置電力，並且擺放物資。呢個全港最大型嘅行山活動，有幾千人參加，所以提早佈置可以話係無可厚非。
不過，網上流傳一張圖片，話有行山人士見有一桶桶嘅蒸餾水放置喺大帽山四方亭，竟然打開水樽為自己補給! 仲話「啲水無寫明唔飲得」，話佢哋唔知開嚟飲有無問題。
其實都無乜需要討論，細細過老父老母都會教:
「不問自取，是為賊也。」
唔講法例呢啲咁高深嘅嘢，講下 common sense。唔係你嘅嘢，就算佢放喺咩地方，都唔應該攞走。呢個絕對係公德心，係家教，係公民質素，大是大非，根本唔使拎出討論。所以，無論嗰啲水有無寫明飲唔飲得都好，唔係你嘅嘢，根本唔應該搞。好彩，都仲有大把網民不齒佢哋所為:
- 又唔係口渴到無水飲會死，做乜搞人哋啲水呢? 你哋行山唔係要帶夠水嘅咩?
- 你哋咁做會令人哋失去預算，正式活動唔夠水叫人哋點算?
- 四方亭啲水要由吉普車先運到去，好大工程。
毅行前一周，吉慶橋的檢查站已展開佈置工作了
----- 廣告 Ad -----
事實上，呢個時間每逢周末都有跑山比賽，呢啲比賽同市民大眾行山係共存，係香港山徑一大特色。山野係大眾資源，行山朋友請善待呢啲活動，唔好手多多破壞:
- 非活動參加者，除非得到大會准許，不要拿取活動補給
- 不要移動、拆去比賽嘅路標或指示
- 互相忍讓，不要在山徑之中休息或阻路
大家既然是山野愛好者，應該尊重其他人用唔同方法去欣賞山野!
山雞
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。