話說每年11月開始,行山界都好熱鬧,尤其係芒草同紅葉旺季,都吸引大量市民上山觀賞,帶出好多問題,而今次想重點講講大棠楓香林。

如果大家有留意近日既新聞同埋某時事節目,都應該知道大棠楓香林人流嚴重爆滿,平日都人山人海,可能有人會歸究喺行山人士身上,不過大家要搞清楚先,大棠上楓香林路線係毫無難度,果批遊人9成9只係「一般郊遊人士」,真正既「行山人士」都應該會好醒目避開呢段時間到楓香林。

人多既楓香林都引發唔少問題,其中以下三點特別值得關注:

交通問題

大棠人口愈見稠密,交通已早有負荷,交通工具只有 K66 巴士和紅VAN,每逢行山旺季也未能應付大量郊遊人士,令居民出入大受影響,在FB群組「大棠友」都有街坊提及實際情況,K66 由大棠總站駛至大棠村迴旋處已經滿座,之後既街坊都難以使用交通工具,如果經濟許可會搭的士,又或者晚上才出門。大棠路沿途都有不少年長居民居住,嚴重影響生活。雖然有所謂的特別班次疏導遊人,但仍未能處理大量郊遊人士,令居民苦不堪言。

衛生問題

近日郊遊人士氾濫,超出楓香林既負荷,但缺乏公德心既郊遊人士大有人在,四處拋棄垃圾,但清潔人手嚴重不足,追不上進度。

環境破壞

環境破壞既情況日益嚴重,有人會為拍照亂踩植物,有人會把部份靚葉折去,更有人會爬上樹上,千奇百怪既破壞形式都會喺12月既楓香林見到。

圖: 郊野公園教育活動計劃 Country Parks Education Programmes
以上問題看似難以解決,但又唔駛咁灰,因為有心既都可以減輕大自然既負擔。以下係有山友回報既好事:

好事

  1. 見到漁護處已經派咗兩個哥哥不停呼籲叫人戴口罩,同埋阻住啲人唔好爬樹,只係遊人太多,效果有限,但職員已經好努力;
  2. 見到其他香港熱心人士都有幫手叫嗰啲外傭同埋新移民唔好採摘;
  3. 都有遊人會主動執垃圾。

雖然做到既都好有限,但人人都有保護環境既心態,點都有D成效。大家睇到楓香林相關資料,都可以諗下可以為大自然環境做到幾多,加油啦。

其實紅葉年年都有,而今次因為疫情關係,特別多人上山睇紅葉,所以唔駛急於一時,出年黎睇都得,咁又可以減輕交通既負荷。

至於交通班次既問題,雖然有區議員跟進緊,加咗班次,但黎得郊遊都可以考慮唔用 K66 返出市區,可以考慮行去屯門 (約6.5km)、大欖轉車站 (沿車路較易,約7km)、元荃古道接走大棠路行出元朗 (約6.5km)、大棠山路 > 僑興路 > 公庵路 (39號小巴),能力許可而可以應付安全問題既請行多幾步,以便分散人流,謝謝。

原文載於 The hiking Database 山野‧新聞庫


文章為作者意見,不代表Fitz立場。
歡迎投稿: http://fitz.hk/contribute/
The hiking Database 山野‧新聞庫
每次出現行山活動的新聞,尤其是意外,「山野‧新聞庫」Admin's都會特別留意,要細心研究意外成因,因為這些不幸的事情都是一個學習,提醒大家如何在行山活動時避免意外發生。