馬騮固然惡，人有時仲惡!
呢排深井、汀九一帶海灘，經常發現有人立亂放生，佢哋將淡水嘅巴西龜放到大海，仲一放放幾百隻，咁做根本唔係放生，而係謀殺！「放生」嘅人一係無知到極點，一係就殘忍到加零一！
呢一類郊野惡行，間中都有山友見到，有啲仲係我山雞親眼見過：
1. 燒烤爐烚粽
地點：屯門嶺南大學後山燒烤場
惡行：一對男女獨佔四五個燒烤爐，用生油罐烚粽。估計一罐烚到30隻，總共超過100隻！最討厭就係，佢哋嘅燃料係斬樹燒柴！
影響：成個燒烤場火光紅紅，又大煙，而燒烤爐咁樣燒法，係會燒爛架！
----- 廣告 Ad -----
燒烤爐應該係用嚟BBQ，啲人貪方便就會亂咁用。
2. 斬竹葉包粽
地點：屯門九逕山山腳
惡行：數名男女用鐮刀採竹葉，據講，嗰啲竹葉可以用嚟包粽！
影響：再咁落去嗰到啲竹樹一定會無晒！
3. 勁摸蜆
地點：烏溪沙泥涌
惡行：一家四口落泥灘勁摸蜆，4個人足足摸咗兩大桶2公升礦泉水樽！啲蜆有大有細，連BB蜆都唔放過。(佢哋食得幾多?)
影響：蜆可以過濾海水，連BB蜆都捉，直到趕盡殺絕！見《[唔好做殺手] 摸蜆破壞海洋生態》
4. 燒烤爐化寶
地點：城門水塘燒烤場
惡行：一行十幾廿人，由身穿喇嘛服飾嘅阿伯帶頭，做完法事就將祭品 (紙錢等) 放喺燒烤爐面頭放火燒。
影響：附近濃煙密佈，入面應該有塑膠 (因為有黑煙)，而燒著嘅紙祭品又會吹到周圍都係，隨時引發山火。同埋，個燒烤爐之後仲點用？
5. 一箱香蕉餵馬騮
地點：石梨貝水塘巴士站公廁外
惡行：一個中年阿叔，坐的士到上址，隨即落車放低一整箱香蕉，拆開後然後上的士走人！成班馬騮餓鬼一樣衝晒出嚟，場面極為可怕！
影響：餵飼馬騮令佢哋倚賴人類，繼而騷擾人類。亂咁餵，其實係害咗佢哋。
唔好餵馬騮呀
6. 包起營地分租
地點：西貢灣仔營地
惡行：有人長期霸佔成個營地，其他人去到插針都插唔入，有人話，佢霸嘅營位係用嚟借出去賺錢。
影響：灣仔南長期逼過旺角，想去露營真係要諗過先。
----- 廣告 Ad -----
如果大家仲有見過其他惡行，歡迎留言提供。
更多：
Fitz.hk Facebook專頁
10大令人討厭的行山行為
10種最令人討厭的露營行為
不可不識嘅郊野塗鴉王
山雞@Fitz.hk
Fitz Hiking 行山
