7月16日星期四,香港武肺本地確診個案創單日新高,其中35宗更係源頭未明。疫症威脅重臨,大家要做足防疫措施,包括唔好大班人聚會,喺公眾地方要戴好口罩等。

不過,地區群組 將軍澳主場 星期四 (16/7) 有人發帖,發現將軍澳出現一個陣容龐大嘅行山隊,上午出現喺維景灣畔對出 (估計去衛徑),發帖網友話唔係唔畀大家去行山,不過就唔好咁大班囉。

「各位想行山人士其實是可以各自4人以下行山的,為什麼要約齊人一起行? 你們真的相信病毒6pm前不會出現?」

香港人對抗病毒有豐富經驗,大多數人都明白疫情下「人多好危險」嘅道理,所以行山時都要嚴格遵守防疫守則:

  1. 幾個人一齊行山就夠 (法例限於4人或以下),人多集體活動,真係好容易傳播病毒
  2. 戴好口罩
  3. 做好個人衛生,定時洗手,未洗手前唔好摸口鼻
  4. 垃圾咪亂丟,特別係口罩或抹過口鼻嘅紙巾,包好先丟入市區嘅垃圾桶
  5. 盡量選擇屋企附近嘅行山徑或晨運徑,避免乘搭公共交通工具時傳播或感染病毒。疫情期間,打少啲卡啦

行山強身健體,可以令心情放鬆,雖然疫情嚴峻,但亦唔需要完全禁絕戶外活動。不過喺自己追求健康生活之餘,亦應該顧及公眾衛生,唔好令香港嘅疫情加劇。


文章為作者意見,不代表Fitz立場。

歡迎投稿: http://fitz.hk/contribute/

山雞
十歲登上魔鬼山,二十歲游走大帽大東鳳凰釣魚翁大刀屻。志願有二:生個仔要叫阿山;登上喜馬拉雅山,掛上真普選直幡。