獅子山精神隊成員 (左至右): Raymond、作者Jacky仔、黃宗顯精神科專科醫生、許耀斌Law少

隊員:何欣倫 (Jacky仔)
毅行者經驗:新手
簡介:二十幾歲年輕人,初中時因學業壓力與人際關係而患上思覺失調。現在於精神復康機構任職朋輩支援工作員,希望成為毅行者,幫助過來人找回自己。


第一次操練: 2017年7月2日 麥理浩徑第四段

「行毅行? 100K? 死人架喎!」

呢幾句係初初我心底嘅說話。

初次受邀試行麥理浩徑,完全未知道毅行者嘅程度,以為係鰂魚涌柏架山嗰種男女老少一家樂也融融的“casual 傾住行”嘅感覺。

點知,出事!


裝備錯,Vans 生膠底鞋,重甸甸嘅書包,袋咗一本schedule book,筆記簿,一本小說,一個筆袋,
一件外套。個裝備完全唔對路。

面對麥理浩徑第四段,落雨,碎石落山路,自己唔識落斜,青苔石面又多又難行,屁股落地撻咗三獲。

圖: Wing Leung’s Outdoor Blog

“下次再行呢段,我一定唔會再來!”

後來面對泥堆已經大無畏,只想盡快行完佢,索性唔避直接踩落去。

面對差唔多斜過45度嘅山路,驚訝之餘,其實現實係“係要行嘅”。

行咗5個鐘,終於完結。

望著自己充滿泥濘嘅雙腳,唔知點解有一份自豪感。
未辛苦過唔知自己局限去到邊。

就係咁,我開始我嘅行山之旅。

第二次操練: 2017年7月9日 麥理浩徑第六第七段

話說第二個星期,明明上次講好:”我唔會再出來!“ 點解我有出返來呢?

無它嘅,係因為第一次雖然辛苦,但成腳泥嘅嗰份滿足感,行到日落西山都未完嘅刺激,一次完成旅程嘅一份真摯友誼,就係我打倒昨日的我嘅一大助力。

今次裝備比較恰當,鞋已經無錯,書包已經唔敢再咁拖泥帶水,可以唔帶嘅盡量唔帶,早一晚早些少訓,開始前多拉筋,果然好咗好多。

上咗針山草山,事後朋友相告才知道上山行咗成千級樓梯,山頂嘅合照,山上嘅景緻,不得了。

雖然返到去依然咁攰,但呢次都算達標完成,仲要之後幾日返工都好精神添,哈哈。

至於第三次上山 (而且是第一次齊人),請睇片 : )

設計鳴謝: 築字室主理人Vicky IG: 築字室

Fitz 樂施毅行者

每年樂毅施行者,Fitz 都會組織一支隊伍,目的不是要挑戰時間,而是希望承傳毅行精神。今年我們以 Law少 許耀斌 帶領一支由精神康復者及精神科醫生組成的隊伍,期望可令市民對精神病有更正確的認識。

有一班行山友叫「獅子山」


更多:
Fitz Facebook專頁
[獅子山精神隊] 37度下 新丁打大佬
[獅子山精神隊] 毅行開操 在西貢37度的一天出發之十八死士
[樂施毅行者2017] Fitz x 獅子山精神隊
Fitz Hiking 行山

廣告
Jacky仔
Jacky仔 - 2017年樂施毅行者「獅子山精神隊成隊」成員。初中時因為學業壓力與人際關係而患上思覺失調。現在於精神復康機構任職朋輩支援工作員,希望完成毅行者,幫助過來人找回自己。