英國商人 Richard Browning 近年被稱為「現實版 Tony Stark」,主要原因係佢靚仔 (有人話咋) 同有錢外,亦多材多藝,既係超馬跑手 (都係有人話,未查到佢跑過乜),又係演說家。而佢最出名,就係擁有一項健力士世界紀錄。

呢項紀錄係由佢發明嘅 Daedalus Mark 1 噴射衣 (jet suit),造出時速136.89公里,創下「人類身體暴露於空中最快嘅飛行速度」。而佢呢件噴射衣,亦成為佢嘅標誌。

Richard Browning 靚仔咩?

用噴射衣協助山野搜救

Richard Browning 致力改良噴射衣,並希望擴展佢嘅用途。最新型號嘅噴射衣,於手臂和背部安裝5個推進器,最高時速為51公里,最高可飛到海拔3658米,但為安全會在較低空實際應用,而 Richard 就希望用佢嚟協助山野搜救。

日前,Richard 更親身著住最新型號噴射衣,同英國空中救援隊 GNAAS 進行演習。Richard 於幾分鐘之內,成功搜索到模擬失踪嘅行山人士。如果用直升機搜索嘅話,最少要花幾個鐘。若然著住噴射衣嘅救援人員攜帶急救用品,更可即時於山間進行救治。

而 Richard 擁有嘅 Gravity Industries,聲稱已經喺30個國家進行過100次飛行。佢哋話要加緊演習,期待於明年正式投入山野救援工作。

資料: 英國衛報Inside Hook

張伯倫
自細肥仔一名,後來因發現患有脂肪肝,決心多做運動注重健康,曾參加並完成毅行者,關注所有健康資訊。