藍地水塘

週末陪個仔去屯門參加活動,接送中有好幾小時空檔,難得嚟到當然搵山行吓。閒遊水塘徑,藍地洪水坑連走。過了新墟,何福善中學旁邊 M200 標誌桿上山,一嚟就斜路加樓梯,好彩阿叔練過吓嘢。

Pump 到上東升亭轉落伴塘徑,有得落山又沙石地,忍唔住跑咗陣。好快水塘漸漸露面,到了水霸,豁然開朗,原來不足一小時路程,就到達如斯寧靜美境。塘上倒影,淡綠的池水,小休一陣再向洪水坑出發。

屯門徑

頭段要搵路,轉了好大個彎,就見到隱世水塘,比之前的更翠綠,旁邊樹木也繁多,倒影構圖比前豐富,遊人都多些,拍照釣魚閒聊談心的都有。大休後按崖邊小路往公路向泥圍走,全程約十公里,路段唔算悶,有上斜有樓級,石屎郊遊徑混合路,路旁有溪水大石,可以小休,著實不錯選擇。

 

洪水坑水塘

回到現實,身為島民,除了公事都唔會踏足屯門,算下去都有四五年。高層住宅林立,大型商場一個連接住一個。今日所的大都是國內人,通處都是人流,唔止人流,還有喼流。人可以站立地踎,喼可以打開平放。商場通道,住宅大廈門口,藥妝店內外,遍地開喼。究竟我哋可以容忍到什麼地步? 還是漠視到那個程度。

好了,想搵嘢食,大商場連鎖店唔想幫襯,落去舊區搵間茶仔……乜原來都變成湘贛,麻辣,米線?我都明「搵食啫! 犯法呀!」的法則。

算我今日來回地獄與天堂之間,懷著復雜心情跳上巴士離去。

Fitz 連結: https://fitz.hk/?p=89146


更多:
Fitz Facebook專頁
[KaiKuen] 6張屯門風景的得獎作品 (附路線)
[行山路線] 6條藏於民居的行山徑
Fitz 行山 Hiking

廣告
Benny Tam
俾個仔一句戲言,點去咗玩一百公里,喜歡行山跑步,玩吓露營,跟街坊組咗隊行山團 #山野坪民