呢幾日見到大家咁肉緊一齊幫手去清潔山徑,實在非常感動呀!

但我哋亦見好多熱心朋友忽視了衞生安全事項,你哋每個人對保護郊野都好重要㗎,唔可以有事,所以我哋希望鄭重地溫馨提示大家: 我哋仍處於疫症時期,所以除咗熱心保護環境,亦都要好好保護自己呀!

以下同大家分享一些清潔山徑時要注意嘅事項:

工具及物資

  • 手套 (防水為佳)
  • 長燒烤夾 (或長臂夾更好)
  • 垃圾袋 (*詳見注意事項5)
  • 完成後包好工具的膠袋
  • 急救包

個人裝備

  • 長袖衣褲,滑面風褸
  • 外科口罩
  • 酒精搓手液
  • 備套乾淨衫及乾淨口罩更換

注意事項

先提大家一件好重要的事情,近日郊野垃圾中有好多係口罩及紙巾等個人衛生用品,呢啲用品上面會帶有體液及細菌,我哋永遠唔會知道亂掉的人是否就是帶菌者,故務請小心處理!!

  1. 執郊野垃圾時請戴上口罩及手套,要明白你保護自己,也是保護隊友及家人的一份責任。
  2. 撿垃圾時小心點,有耐性,勿心急,避免讓任何水份或污物彈上頭部或身體。
  3. 不必介懷執到幾多垃圾,量力而為便可,太骯髒的、跌落山坡的垃圾,就不要勉強去執。很多山坡下的垃圾,已經累積多年,新仇舊恨,可能已非常污染,請記下這些黑點,稍後再找專業部門或團體處理。
  4. 多著重宣傳教育,不妨沿途向行山人士呼籲 #自己垃圾自己帶走。記住,我哋終極目標係要教育每一個郊遊人士有公德心,而唔係長期幫佢哋執手尾!
  5. 避免將垃圾攬上身,故垃圾袋的尺寸就非常重要了。垃圾袋以厚身不易穿為佳,大型黑色垃圾袋裝滿會很重,袋太長又會拖地,所以我哋建議你可以問附近洗衣店送你幾個大膠袋,或利用家裡的舊膠袋 (例如網購袋、條裝廁紙的大膠袋等),又環保又好用。
  6. 完成後,垃圾要拎去垃圾站、放入有蓋大型垃圾桶內,或專門防止野生動物摷垃圾而設計的垃圾桶內 (小量垃圾適用)。如果放進一般郊野公園嘅垃圾桶,好可能又比野生動物翻返晒出嚟。(見留言的照片)
  7. 抗疫不忘回收,乾淨膠樽 (無液體及垃圾在內) 可分開放進膠樽回收桶。
  8. 不妨食飽啲先出發,中途休息飲水食嘢,都要先去洗手間用肥皂洗手或用酒精搓手液徹底清潔雙手。
  9. 我哋有個小技巧係,可以派其中一兩人做 clean team,不落手執垃圾,專門幫大家影相或做一些需要對乾淨手的事情。
  10. 完成後,記得把用過嘅工具清洗及消毒。
  11. 其餘在抗疫期間郊遊活動時要注意嘅事項,例如唔好攬頭攬頸、唔好口抹橫飛、避免集體聚餐等等,醫生都同大家講咗好多啦,我們不在這裡嘮嘮叨叨了。
  12. 在這非常時期,大家進行山徑清潔行動前,要仔細衡量風險,唔舒服或狀態不佳就唔好去啦。保護自己是優先,也不為醫護增加負擔。

以上係我哋嘅少少經驗分享,歡迎 share 俾日內打算清潔山徑的朋友。

綠惜地球 The Green Earth Facebook 專頁


文章為作者意見,不代表Fitz立場。

歡迎投稿: http://fitz.hk/contribute/

綠惜地球 The Green Earth
現今過度虛耗資源的生活形態,可能給我們短暫滿足,長遠卻帶來環境敗壞。垃圾圍城、氣候變化、健康風險….. 我們真的只追求眼前物欲,不為自己的未來和下一代著想? 環保團體「綠惜地球」深信,大家都可以成為綠色公民,共同發揮零浪費的綠色正能量,及時扭轉環境敗壞,讓健康和綠色生活延續下去。現在就行動吧!https://www.facebook.com/greenearthhk