當行山成為潮流,大東山芒草成為網上「敏感詞」,一窩蜂嘅香港人就會蠢蠢欲動,除咗向 Facebook 大神「求神問卜」,亦有人試圖組織網上行山團,享受結伴同遊嘅樂趣。例如最近就有唔少人利用WhatsApp,組織行山團。

行山活動有一定危險,所以搵同伴一齊行山,絕對係正確做法。問題在於,喺網上群組組團行山,其實有唔少安全隱患:

1. 領隊有無專業資格?

幾十年前都有民間自組行山團,一啲經驗豐富嘅行山愛好者,會在行山用品店舖發佈消息招收成員,有啲更加喺報紙刊登廣告。無論係印發通告以至刊登廣告,籌組行山團都需要一啲成本,所以搞得行山團通常都係啲有心有力,仲係有經驗有能力嘅行山老手。

一個「合格」的帶團者,需要熟悉路線,掌握成員能力,以及有基本嘅行山、天氣以至急救知識,而最重要就係有責任心。而家 Facebook 打幾隻字就可以組團,呢啲「網上領隊」係咪一定符合上述原則呢?

若果一班新手盲舂舂跟著一位唔熟路線,又唔責任嘅「領隊」,後果真係唔敢想像。

大東山係唔少人夢想嘅目的地  (圖: 網友 Annie Woo)

2. 參加者勿大安旨意

從網上觀察,唔少參加者嘅心態,只係希望有人帶路去目的地打卡,大部份只係知道路線大概距離同時間,萬一遇到突發情況,其實相當危險。

作為一個負責任行山人士,上山之前先了解一下路線,留意天氣變化,帶夠充足糧水裝備,既可減少領隊壓力,亦可保障自己安全。

3. 搵個伴一齊

有啲網上行山團採取自助方式,領隊會按預先安排嘅步伐,團員自己跟隨。某些更講明「不設殿後」,行得慢閣下自理。所以,就算參加行山團,最好亦搵個朋友一齊,萬一被人中途遺棄,亦有個朋友互相照應。

4. 網上交友要謹慎

朱咪咪教落,網上交友要小心,搵領隊都係一樣。參加任何行山團,除非有專業認證,否則參加前先了解帶團人士經驗、學識、專業資格、口碑等,一定有著數。


文章為作者意見,不代表Fitz立場。

歡迎投稿: http://fitz.hk/contribute/

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。