Mount Elbert

當今人人都怕接到詐騙電話,收到匿名來電 block 都 block 唔切。不過呢位山客 block 得太徹底,累搜救隊要通宵搵佢。

說話美國一名行山客,去科羅拉多州 Mount Elbert 行山,佢計劃路線大概要行7個鐘,朝早9點出發,但到夜晚8點都未落山。當地野外搜救隊發現有人仲喺山上,就嘗試打電話要求報告行踪。不過,搜救隊打咗好多次都無人聽,無計可施之下,先後派出兩支搜救隊上山搵人,同時繼續打電話搵佢,可惜都係徒勞無功。

最後喺第二日朝早10點,呢名山客施施然喺停車場攞車。一問之下,發現山客並唔係收唔到電話,只係見到個來電顯示唔知係邊個,就無接到電話。

事後,負責搵人嘅搜救隊喺 Facebook 呼籲,行山時如果接到相同電話號碼來電,有可能係搜救隊嘗試確認你嘅安危,不妨聽咗先,千祈唔係當係詐騙電話。

 

首頁 > 運動 Sports > 行山 Hiking > 美國山客拒接匿名電話,累救援人員通宵搜救