小學雞問題: 呢個涼亭喺邊一條山徑?

行山group周不時都會有人發起呢類「估圖遊戲」,咪以為好無聊,原來真係好有建樹。美國就多得一位好叻認位置嘅行山發燒友拔刀相助,成功救出一名迷路山客。

Angeles National Forest
事發於 Angeles National Forest

Rene Compean 日前到 Angeles National Forest 行山,點知迷路缺水缺糧,絕望之下坐喺懸崖影低「最後一景」,並將相片發佈上網。朋友睇到大驚,立即報警求救。

不過,呢個時候Rene手機無訊號,警察唔知佢嘅位置,唔可以搵救援住。於是將呢張「最後貼圖」公開,向公眾查詢影相嘅確實位置。結果,山界奇人 Benjamin 一睇之下,竟然知道位置,仲將位置坐標提供畀警察,令救援人員可以成功救人。

最後一帖

Benjamin 話,自己好鍾意行山,有個嗜好係上網睇行山相然後估地點,點知今次真係大派用場。而被救出嘅 Rene 身體無大礙,佢仲好多謝 Benjamin 呢個特別嗜好,令佢可以逃出生天。

被救後要面對刑責

但係,事情並未完結。原來疫情之下,Angeles National Forest 關閉,公眾不得進入。Rene 呢次驚動警察,自然斷到正,當場被警方起訴。若然成功定罪,Rene 面臨半年監禁及一萬美金罰款!

如果被罰錢坐監,Rene真係地獄黑仔王,行山迷路仲要受罰,慘慘!

#小學雞問題答案: 一睇地下嘅石板路,就估到係元荃古道啦。確實位置係蓮花山公立學校對出。

資料: CBS


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 美國男子迷路絕望下拍下最後照片,「估圖達人」破解坐標成救人英雄