早排 ViuTV 有個行山節目叫《美女郊遊遊》，引來唔少討論。節目播足兩個禮拜，我山雞身邊班朋友就講足兩個禮拜。以香港人特性，佢哋梗係唔係讚不絕口，而係彈到一文不值! 總括而言，佢哋覺得呢個節目有5大宗罪。
一宗罪: 裝備唔專業
話說節目未播出，Facebook 有條宣傳在網上瘋傳，結果電視台話只係愚人節玩笑。節目出街後，先發現佢哋所謂嘅「著三點式行山」，其實只係去廈門灣游完水，行石屎路上個小山崗遠望嗰條「連島沙洲」。盛夏時份，唔好話橋咀，大浪西灣、大坳門，大把人游完水都係咁樣著住去行山啦。
況且只要細心留意，都發現呢個節目嘅服裝由O記贊助，佢哋一身唔係 Mont-bell 就係所記，都唔使質疑佢哋裝備唔合規格。
二宗罪: 不自量力
節目第一集就叫兩位無乜點行過山嘅女仔去「針草帽」，由天光行到天黑。幾集之後仲竟然去爬蚺蛇尖，又去爬南屏石澗、雙鹿石澗。唔少人話呢兩位主持係不自量力，市民有樣學樣易生意外。
不過，有認真睇過節目都知，佢哋個攝製隊一行十幾廿人，有行山教練陪行，同平時周末喺山上嗰啲拎住部手機同500ml水上大東山嘅情侶絕對唔同。
三宗罪: 公開行山路線
呢個罪名我山雞唔係好明，總之每逢有媒體介紹行山路線，總有人鬧:「講咩路線呀，而家嫌山頭唔夠多人咩!」
你唔講，條山徑唔會喺山頭消失。你唔講，市民有心去山，但得唔到正確資訊，咪仲容易發生意外!
四宗罪: 從事高危活動
有人話，兩位主持跳水潭、爬瀑布、喺獅子山游繩等，係鼓勵市民喺郊外玩啲高危活動喎。
跳潭我山雞都同意唔值得推廣，不過攀石、游繩呢啲係正常活動，而且有晒教練、set 晒安全繩，若果做足安全措施又點解唔玩得?
五宗罪: 赤徑露營犯法
赤徑唔係政府營地，唔可以露營，呢個係事實，我反駁唔到。同理，馬鞍山礦洞亦唔應該入去，好危險的。
總有新手喺左近
不過，大家只要留意個節目，無論係兩位主持定係製作團隊，都強調呢個節目係「真人show」，再加少少行山資訊。所以，大家對於節目入面嘅郊遊內容，無需要太執著，只要無講錯料，唔教壞人，已經可以接受。
事實上，節目如果以真人show為主題，呢個節目又確實好有真人feel。見佢哋行針草帽行到爆喊好似好浮誇? 唔通你未試過陪人行元荃古道，由柴灣角未上到油柑頭，已經有人頂唔順啲樓級要回頭? 你話行山唔好袒胸露背，咁佢哋都一樣話畀蚊針話畀太陽曬; 未操過行蚺蛇尖、行石澗，其實呢啲苦況每個周末都會喺山頭出現。
呢個節目提醒大家，總有行山新手喺左近，我哋如果想令多啲人享受山野，好應該幫助佢成長。行山唔係球類運動，無嚴格規則，各有各法，只要安全，其實唔需要咁執著。
圖片採自電視節目截圖
十歲登上魔鬼山，二十歲游走大帽大東鳳凰釣魚翁大刀屻。志願有二：生個仔要叫阿山；登上喜馬拉雅山，掛上真普選直幡。
