[自殺崖玩層層叠]「極限打卡」令人生更精彩?


早兩日又有人喺飛鵝山自殺崖「極限打卡」,進行高難度動作,結果被人放上網,遭受大批網民追殺。其實呢類事件大家已經耳熟能詳,講得多都嫌自己長氣。不過,呢次有啲唔同,有人另外發帖,維護呢個行為:

「我覺得行山本身已經有風險,你好地地有商場唔行,走去行山,陣間比蛇咬咪又係麻煩到人。

正正係因為生命無 take 2,有咩想要做就去做啦,前怕鬼後驚賊,做人有咩意思?」

呢位樓主喺留言區,有詳細解釋自己睇法:

其實我每次見到有人被人公審做危險嘢,又或者某某人在某山某澗跌死然後一大堆人出嚟扮事後孔明時都會好嬲, 到底危險的嘢係點定義? 你又有無做過唔百份百安全的嘢?

我相信很多人為了打卡都會置自己於危機之間, 人固然要理性考量自己安全, 但適當的風險會令人生更加精彩。

網民留言

呢個時勢,曲直難分。唔知呢位朋友係直線抽擊定指桑罵槐,總之言論公開之後,引來過百留言。正反雙方都有。反對樓主,反對「極限打卡」嘅留言就一大堆,好多都好精警:

  • 行山都有風險,所以應該行商場算? 咁你不如話做人都有風險,不如唔好做啦好冇? 反正揸車有風險,不如個個都超速駕駛,個邏輯係未咁? 然後話安全駕駛D人廢,眼紅人地夠pop揸快車。
  • 香港人真係好搞笑,提你危險叫你小心叫你唔好做你就話條命係自己,唔比你做係剝奪你人身自由。到出左事死唔去又話果到危險冇提示,又話身邊咁多人經過都唔提自己危險話人冷血見死不救,香港人真係好麻煩。
  • 嗱,樓主,我就做搭棚嘅,做呢行就三四十樓都爬出去,我諗比大多數人夠pop。但我地都會做足安全措施。你會唔會覺得我好廢呀?

  • 做得出怕咩人指指點點呀? 怕就咪鬼做,到比人睇到囉!
  • 生命無take2,咁自己無去死
  • 呢單野公審有咩野問題? 果兩條友跌左落去要人救, 係咪累死消防員先, 唔係奉旨要救你架, 唔該諗清楚先開呢個POST出嚟得唔得呀
  • 落海游水同八號風球落海游水既分別,會唔會有人唔識分?
  • 駕車失控撞到你係意外,你有交通燈唔睇沖出馬路比車撞係另一回事,明唔明呀?真心想睇下你咩樣,咁好采見到你有事,我會講返你呢句:條命你既,理得你
  • 生命誠可貴,愛情價更高;若為打卡故,兩者皆可拋。

又有人貼呢張圖做回應:

支持樓主

唔使講,一張圖可以概括:

圖: 好集慣

極限運動 Vs 極限打卡

筆者唔講支持邊一邊,只係提一提大家,「極限運動」同「極限打卡」有好明顯嘅分別:

極限運動 極限打卡
訓練 運動員經過長時間及有系統嘅訓練 可能有,亦可能無,不過正規運動應該無極限打卡呢一項
計劃 事前有完整及詳細計劃 唔肯定有無,可以好有準備亦可即興
安全措施 安全係極限運動嘅第一位,運動員會穿戴嚴格嘅安全裝備 不詳
目的 挑戰自我,並且宣揚人類冒險精神 可能同極限運動相同,但多一項: 呃like
結果 被受讚揚 備受公審

「極限運動」之所以被人肯定,係因為運動員都接受過嚴格訓練,以及有充足嘅安全措施,可以應付到最壞嘅情況。至於即興嘅「極限打卡」,睇落似冒險,但若無經過訓練以及無安全措施,就真係唔好亂嚟呀。


文章為作者意見,不代表Fitz立場。

歡迎投稿: http://fitz.hk/contribute/

訂閱Fitz電郵通訊,接收活動、產品及優惠資訊!

朱溫
生於亂世,有種責任。這個責任就是做好自己,感染別人。鍛練好身體,才能裝備自己,迎接亂世。