香港山多,郊野天梯亦多。無論行山新手定老手,當你企喺針山1900級樓梯之下,上樓梯的確係一個涉及體力、意志,以及勇氣嘅行為。上山識得行其實唔難,只要留意幾個要點。

輕鬆行山上樓梯方法

行山上樓梯如果不得其法,除咗會肌肉無力腳軟軟,心跳一下過快更會出現體力不支,嚴重者更會頭暈、心悸等。所以,上樓梯時要注意:

  1. 上山前: 做足熱身運動令肌肉放鬆,亦令血液流通
  2. 初段最緊要慢,切勿急進,留意呼吸,若感到呼吸困難,必須立即放慢腳步
  3. 踏樓梯禁忌
    • 禁忌一: 只用腳前掌踏上樓級,腳踭懸空,用腳尖發力
    • 禁忌一: 認為「長苦不如短痛」,兩級一步,一氣口衝上山

行山上樓梯,要緊記最重要原則: 唔需要行到氣來氣喘,慢慢行輕輕鬆鬆就最好。

錯誤: 半掌上樓級,要腳尖用力,速度或者會快啲,但較難持久。

婆仔上樓梯大法

山界流傳一招「婆仔上樓梯大法」,原則同以上所講吻合。唔係要鬥快,而係保證唔會腳痛唔會扯氣:

  1. 腳掌要整隻踏上梯級,盡量避免用腳尖發力,因小腿肌肉會好快繃緊
  2. 越細步越著數: 腳尖盡量貼向上一級下方,目的係減少抬腿幅度,慳力之餘並要大腿用力
  3. 上半身保持挺直
  4. 遇到樓級太闊,可逐級而上,雙腳踏在同一級上,穩定後再上下一級
  5. 腳步唔需要太快,要有節奏,一步一步行就得,緊記欲速則不達
  6. 呼吸: 切勿太急太用力,可採取4步呼吸法,即1吸2忍3忍4呼,將吸入氧氣留在身體多一點時間
  7. 上到山頂,記得鬆下腳,向側邊踢幾踢,或拉筋
正確: 全掌放上上一級,腳尖盡量貼近前面,大腿用力逐級逐級上,可慳體力

留意返,有人話平時返屋企、返工唔搭電梯,改行樓梯,對行山會有益處。不過山徑嘅樓梯有高有低,有窄有闊,同大廈樓梯有一定分別,所以想行山越行越輕鬆,實地訓練不可少。


文章為作者意見,不代表Fitz立場。
歡迎投稿: http://fitz.hk/contribute/
首頁 > 運動 Sports > 行山 Hiking > 輕鬆行山上樓梯.婆仔上山大法